ក្រុមហ៊ុនដែកថែប Nippon Steel នៅទីបំផុតអាចសម្រេចបានកិច្ចព្រមព្រៀងទិញយកក្រុមហ៊ុនដែកថែបអាមេរិក US Steel ក្នុងតម្លៃ ១៤,៩ពាន់លានដុល្លារ កាលពីថ្ងៃពុធ (១៨ មិថុនា) ដែលបញ្ជាក់ពីកម្រិតអំណាចដ៏មិនធម្មតាសម្រាប់លោកប្រធានាធិបតីអាមេរិក Donald Trump បន្ទាប់ពីឧបសគ្គរយៈពេល ១៨ខែដែលក្រុមហ៊ុនជប៉ុនមួយនេះពិបាបសម្រេចបានកិច្ចព្រមព្រៀងទិញលក់។

នៅក្រោមលក្ខខណ្ឌនៃកិច្ចព្រមព្រៀង ក្រុមហ៊ុន Nippon បានទិញភាគហ៊ុន ១០០% របស់ US Steel ក្នុងតម្លៃ ៥៥ដុល្លារក្នុងមួយហ៊ុន ដូចដែលបានដាក់ចេញជាលើកដំបូងនៅក្នុងសំណើផ្តល់ជូននៅខែធ្នូ ឆ្នាំ២០២៣ របស់ខ្លួន សម្រាប់អ្នកផលិតដែកថែបដ៏ល្បី ប៉ុន្តែកំពុងជួបការលំបាកមួយនេះ។

ក្រុមហ៊ុនទាំងពីរក៏បានបង្ហាញពីព័ត៌មានលម្អិតនៃកិច្ចព្រមព្រៀងសន្តិសុខជាតិ ដែលបានចុះហត្ថលេខាជាមួយរដ្ឋបាលអាមេរិក ដែលផ្តល់ឱ្យលោក Trump នូវសិទ្ធិអំណាចក្នុងការដាក់ឈ្មោះសមាជិកក្រុមប្រឹក្សាភិបាល ក៏ដូចជាចំណែកភាគហ៊ុនដ៏ធំដែលមិនមែនជាសេដ្ឋកិច្ចជាក់ស្ដែង។

អ្នកនាំពាក្យសេតវិមាន លោក Kush Desai បានហៅកិច្ចព្រមព្រៀងនេះថាជាជំហានប្រវត្តិសាស្ត្រ ហើយនិយាយថា ចំណែកភាគហ៊ុនដ៏ច្រើនលើសលប់នេះនឹង "ការពារសន្តិសុខជាតិ និងសេដ្ឋកិច្ចរបស់អាមេរិក"។ លោក Eiji Hashimoto ប្រធាន និងជានាយកប្រតិបត្តិរបស់ Nippon Steel បានថ្លែងអំណរគុណចំពោះលោក Trump សម្រាប់តួនាទីដ៏សំខាន់របស់លោក ដោយបន្ថែមថា "Nippon Steel មានការរំភើបចិត្តជាខ្លាំងចំពោះការបើកទំព័រថ្មីនៃប្រវត្តិសាស្ត្ររបស់ US Steel"៕