បាល់ទាត់៖ ការប្រកួតបាល់ទាត់ជម្រើសជើងឯកកម្ពុជាលីគទី២ ឆ្នាំ២០២១ បានបញ្ចប់ហើយក្រោយចំណាយពេលប្រកួត ១ខែពេញ ដោយក្រុមយុវជន U-18 សាលាបាល់ទាត់ជាតិបាទីបានគ្រងតំណែងជើងឯក បន្ទាប់ពីខេត្តត្បូងឃ្មុំបានបង្អាក់ដំណើររបស់ក្រុម ISI ដង្កោសែនជ័យដោយយកឈ្នះក្នុងលទ្ធផល ២-១ ក្នុងជំនួបបញ្ចប់សប្ដាហ៍ទី៧ នៅទីលានមជ្ឈមណ្ឌល និងសាលាបាល់ទាត់ជាតិបាទីកាលពីចុងសប្ដាហ៍កន្លងទៅ។
ក្នុងនាមក្រុមសល់ឱកាសដណ្ដើមពានរវាងក្រុម U-18 បាទី និង ISI ដង្កោសែនជ័យ សហព័ន្ធបានសម្រេចរៀបចំការប្រកួតសន្សំពិន្ទុ សប្ដាហ៍ចុងក្រោយទាំង ២គូនេះនៅសាលាបាល់ទាត់ជាតិបាទី។ ជាលទ្ធផលក្រុមយុវជនបាទីបានយកឈ្នះខេត្តបន្ទាយមានជ័យ ១-០ ហើយ ៣ពិន្ទុនេះគ្រប់គ្រាន់ឲ្យពួកគេលើកពាន ដោយមាន ១៨ពិន្ទុមានប្រៀប ២ពិន្ទុលើក្រុម ISI ដង្កោសែនជ័យដែលប្រកួតចាញ់ខេត្តត្បូងឃ្មុំ ២-១។ លោក Koji Gyotoku គ្រូបង្គោលក្រុម U-18 បាទីបានសម្ដែងនូវក្ដីរីករាយចំពោះសមិទ្ធផលដែលកូនក្រុមរបស់ខ្លួនធ្វើបាន ទោះបីមានឧបសគ្គមួយចំនួនដោយសារការប្រកួតមានរយៈពេលខ្លីក៏ដោយ។ លោករំពឹងថា កីឡាករវ័យក្មេងកម្ពុជានឹងបន្ដការខិតខំប្រឹងបន្ថែមទៀតដើម្បីអភិវឌ្ឍន៍ខ្លួនឲ្យបានខ្លាំង និងកាន់តែរីកចម្រើននាថ្ងៃអានគត។
លោក កែវ សារ៉េត អគ្គលេខាធិការសហព័ន្ធកីឡាបាល់ទាត់កម្ពុជា បានវាយតម្លៃខ្ពស់ចំពោះការប្រកួតលីគទី២ ឆ្នាំនេះដែលបញ្ចប់ដោយជោគជ័យទោះបីមានរយៈពេលខ្លីក្ដី។ ប៉ុន្ដែក្រុមជ័យលាភីមិនប្រាកដបានឡើងលេងលីគកំពូលកម្ពុជាឆ្នាំ២០២២ នោះទេ ព្រោះក្រុមហ៊ុនលីគកំពុងធ្វើការពិចារណាលើលក្ខណៈសម្បត្តិរបស់ក្រុមនីមួយៗ។ សូមបញ្ជាក់ថា លីគទី២ ឆ្នាំនេះមានបេក្ខភាព ៨ក្រុមចូលរួមដោយប្រើរូបមន្ដប្រកួតសន្សំពិន្ទុវិលជុំ ១ជុំ។ ជាលទ្ធផលក្រុមជើងឯកយុវជនសាលាបាល់ទាត់ជាតិបាទីឆ្លងកាត់ ៧ប្រកួតឈ្នះ៦ និងចាញ់ ១ រកបាន ១៨ពិន្ទុ ខណៈក្រុមជើងឯករង ISI សង្កោសែនជ័យ ឆ្លងកាត់ ៧ប្រកួតឈ្នះ ៥ ស្មើ ១ និងចាញ់ ១ រកបាន ១៦ពិន្ទុ និងខេត្តត្បូងឃ្មុំឈរលេខ៣ ក្រោយឆ្លងកាត់ ៧ប្រកួតដូចគ្នា ឈ្នះ ៤ ស្មើ ២ និងចាញ់ ១ រកបាន ១៤ពិន្ទុ៕
អត្ថបទ៖ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
