ទង់ជាតិនៅទូទាំងទីក្រុងគីវ របស់អ៊ុយក្រែន ត្រូវបានបន្ទាបមកត្រឹមពាក់កណ្តាលដងកាលពីថ្ងៃពុធ (១៨ មិថុនា) ខណៈប្រជាជនអ៊ុយក្រែន បានកាន់ទុក្ខមនុស្សជិត ៣០នាក់ ដែលត្រូវបានសម្លាប់កាលពីមួយថ្ងៃមុននោះ នៅក្នុងការវាយប្រហារដ៏បង្ហូរឈាមបំផុតរបស់រុស្ស៊ី លើរដ្ឋធានីគីវក្នុងឆ្នាំនេះ។

ប្រធានាធិបតីអ៊ុយក្រែន លោក Volodymyr Zelenskiy បាននិយាយថា កងកម្លាំងរុស្ស៊ី បានបាញ់យានដ្រូន ៤៤០គ្រឿង និងបានបាញ់មីស៊ីល ៣២គ្រាប់ ក្នុងអំឡុងការវាយប្រហារពេលយប់ដ៏ធំ ដោយកម្ទេចអគារលំនៅដ្ឋានមួយផ្នែកឱ្យរាបស្មើដល់ដី នៅក្នុងការវាយប្រហារចុងក្រោយបំផុតលើប្រជាជនអ៊ុយក្រែនដែលធុញទ្រាន់ហត់នឿយនឹងសង្គ្រាម ខណៈកិច្ចខិតខំប្រឹងប្រែងការទូតដើម្បីបញ្ចប់ជម្លោះ ទទួលបានផ្លែផ្កាតិចតួចណាស់។

អភិបាលក្រុងគីវ លោក Vitali Klitschko បាននិយាយកាលថ្ងៃពុធថា ចំនួនអ្នកស្លាប់បានកើនឡើងដល់ ២៨ នាក់ ប៉ុន្តែប្រតិបត្តិការស្វែងរកកំពុងបន្ត។ មនុស្សពីរនាក់ផ្សេងទៀតក៏ត្រូវបានសម្លាប់ក្នុងការវាយប្រហារដាច់ដោយឡែកមួយលើទីក្រុងកំពង់ផែ Odesa ភាគខាងត្បូង។

ក្រុមមន្ត្រីអ៊ុយក្រែននិយាយថា ទីតាំងប្រហែល ២៧កន្លែងនៅទីក្រុងគីវ រួមទាំងស្ថាប័នអប់រំ និងហេដ្ឋារចនាសម្ព័ន្ធសំខាន់ៗត្រូវបានវាយប្រហារ ក្នុងអំឡុងប្រតិបត្តិការយោធាដោយរលកសព្វាវុធចម្រុះ ហើយមនុស្សជាច្រើននាក់ទៀតត្រូវរបួស។ ក្រសួងការពារជាតិរុស្ស៊ីនិយាយថា ខ្លួនបានប្រើមីស៊ីលបាញ់ពីផ្លូវអាកាស ដីគោក និងសមុទ្រ រួមទាំងយានដ្រូន ដើម្បីវាយប្រហារ "គោលដៅអគារឧស្សាហកម្មយោធាអ៊ុយក្រែន" នៅក្នុងតំបន់គីវ និង Zaporizhzhia ភាគខាងត្បូង៕