អ៊ីរ៉ង់ និងអ៊ីស្រាអែល ដែលជាគូសត្រូវដ៏យូរអង្វែងទាំងពីរ បានបន្តវាយប្រហារតាមផ្លូវអាកាសបន្ថែមទៀតដាក់គ្នាទៅវិញទៅមកក្នុងថ្ងៃទីប្រាំពីរនៃជម្លោះ នាថ្ងៃព្រហស្បតិ៍ (១៩ មិថុនា) នេះ ខណៈលោកប្រធានាធិបតី Donald Trump បានធ្វើឱ្យពិភពលោកងឿងឆ្ងល់ថាតើសហរដ្ឋអាមេរិក នឹងចូលរួមក្នុងការទម្លាក់គ្រាប់បែកជាមួយអ៊ីស្រាអែល ទៅលើទីតាំងនុយក្លេអ៊ែរអ៊ីរ៉ង់ដែរឬទេ។

មួយសប្តាហ៍នៃការវាយប្រហារតាមអាកាស និងមីស៊ីលរបស់អ៊ីស្រាអែល ប្រឆាំងនឹងគូប្រជែងដ៏សំខាន់របស់ខ្លួន បានកម្ចាត់ប្រមុខបញ្ជាការយោធាសំខាន់ៗរបស់អ៊ីរ៉ង់ ធ្វើឱ្យខូចសមត្ថភាពនុយក្លេអ៊ែររបស់ខ្លួន និងបានសម្លាប់មនុស្សរាប់រយនាក់ ខណៈការវាយប្រហារសងសឹករបស់អ៊ីរ៉ង់ ក៏បានសម្លាប់ជនស៊ីវិលអ៊ីស្រាអែលរាប់សិបនាក់ផងដែរ។

ទីភ្នាក់ងារសារព័ត៌មាន SNN ពាក់កណ្តាលផ្លូវការបានរាយការណ៍ថា នៅព្រឹកថ្ងៃព្រហស្បតិ៍នេះ ប្រព័ន្ធការពារដែនអាកាសត្រូវបើកឱ្យសកម្មនៅក្នុងទីក្រុងតេអេរ៉ង់ ដោយស្ទាក់ចាប់យានដ្រូនជាច្រើនគ្រឿងនៅជាយរដ្ឋធានី។ បណ្ដាទីភ្នាក់ងារសារព័ត៌មានអ៊ីរ៉ង់ក៏រាយការណ៍ដែរថា ខ្លួនចាប់បាន "ភ្នាក់ងារសត្រូវ" ១៨នាក់ ដែលកំពុងសង់យានដ្រូនសម្រាប់ការវាយប្រហាររបស់អ៊ីស្រាអែល នៅក្នុងទីក្រុង Mashhad ភាគឦសាន។

នៅខាងអ៊ីស្រាអែលវិញ យោធាបាននិយាយថា ស៊ីរ៉ែនប្រកាសអាសន្នបានបន្លឺឡើងនៅភាគខាងជើងអ៊ីស្រាអែល និងនៅជ្រលងភ្នំហ្ស៊កដានី ក្នុងថ្ងៃព្រហស្បតិ៍នេះ ហើយថា ខ្លួនបានស្ទាក់ចាប់យានដ្រូន ២គ្រឿងដែលបាញ់ចេញពីអ៊ីរ៉ង់។

ជម្លោះដ៏អាក្រក់បំផុតមិនធ្លាប់មានរវាងគូសត្រូវជាប្រវត្តិសាស្រ្តទាំងពីរនេះ បានបង្កើនការភ័យខ្លាចថានឹងអូសទាញមហាអំណាចពិភពលោក និងស្ថិរភាពក្នុងតំបន់ ដែលត្រូវបានបំផ្លាញរួចទៅហើយដោយឥទ្ធិពលនៃសង្គ្រាមហ្កាហ្សា ឱ្យធ្លាក់ក្នុងជ្រោះដ៏ជ្រៅ។ ថ្លែងទៅកាន់អ្នកសារព័ត៌មាននៅខាងក្រៅសេតវិមានកាលថ្ងៃពុធ លោក Trump បានបដិសេធមិនបញ្ជាក់ឡើយថា តើលោកបានសម្រេចចិត្តណាមួយរួចហើយឬនៅ ជុំវិញចូលរួមក្នុងយុទ្ធនាការផ្លូវអាកាសរបស់អ៊ីស្រាអែល៕