ប្រទេសជុំវិញពិភពលោកកំពុងជម្លៀសពលរដ្ឋរបស់ពួកគេចេញពីប្រទេសអ៊ីស្រាអែល និងអ៊ីរ៉ង់ ខណៈ ជើងហោះហើរត្រូវបានលុបចោល ហើយដែនអាកាសត្រូវបានបិទដោយសារតែសង្គ្រាមអាកាសនៅមជ្ឈិមបូព៌ា។

ជើងហោះហើររាប់រយត្រូវបានលុបចោល ឬពន្យារពេល។ អ្នកជម្លៀសជាជនជាតិអឺរ៉ុប ភាគច្រើនដែលចាកចេញពីអ៊ីស្រាអែល ត្រូវបានដឹកតាមរថយន្តក្រុងទៅកាន់ប្រទេសហ្ស៊កដានី ឬអេហ្ស៊ីប មុនពេលហោះហើរទៅកាន់ប្រទេសកំណើតរបស់ពួកគេ។ការជម្លៀសនេះកើតឡើង ខណៈការបាញ់ផ្លោង និងការគំរាមកំហែងដាក់គ្នាកាន់តែខ្លាំងរវាងអ៊ីស្រាអែល និងអ៊ីរ៉ង់ បានឈានចូលដល់ថ្ងៃទី៧នៃជម្លោះ។

ប្រទេសចិនបានជម្លៀសពលរដ្ឋជិត៨០០នាក់ហើយបានចាប់ផ្តើមដឹកជញ្ជួនមនុស្សមួយចំនួនទៀតចេញពីទីក្រុងតេអេរ៉ង់ទៅកាន់ប្រទេសតួកមេនីស្ថាន ដោយរថយន្តក្រុង ដែលមានចម្ងាយ១.១៥០ គីឡូម៉ែត្រ។

តំណាងក្រសួងការបរទេសរបស់ប្រទេសនេះបាននិយាយថា ជនជាតិចិនសរុបចំនួន ៧៩១ នាក់ ត្រូវបានផ្លាស់ប្តូរទីលំនៅរួចហើយពីប្រទេសអ៊ីរ៉ង់ទៅកាន់តំបន់សុវត្ថិភាព ហើយជាង១.០០០នាក់ទៀតកំពុងស្ថិតក្នុងដំណើរការជម្លៀស។

ក្រសួងការបរទេសឥណ្ឌាបាននិយាយថា និស្សិតឥណ្ឌានៅទីក្រុងតេអេរ៉ង់ ត្រូវបានដឹកជញ្ចូនចេញពីទីក្រុងនេះ ដោយរបាយការណ៍ប្រព័ន្ធផ្សព្វផ្សាយបង្ហាញថាមនុស្ស១១០ នាក់ត្រូវបានផ្លាស់ទីលំនៅថ្មី។ 

ប្រជាជនប៉ាគីស្ថានរាប់រយនាក់ដែលរស់នៅក្នុងប្រទេសអ៊ីរ៉ង់ បានទៅដល់ច្រកព្រំដែន Taftan កាលពីថ្ងៃពុធសប្ដាហ៍នេះ ខណៈពួកគេធ្វើដំណើរត្រឡប់ស្រុកកំណើតវិញ។

ជាមួយគ្នានោះ នៅមានប្រទេសជាច្រើនទៀត ដែលបានជម្លៀសពលរដ្ឋរបស់ខ្លួនចេញ រួមមាន       ប៊ុលការី អង់គ្លេស អាល្លឺម៉ង់ កោះស៊ីប ប៉ូឡូញ អាល់បានី អូទ្រីស ប៊ែលហ្ស៊ិក បារាំង ហ្ស៊កហ្ស៊ី      ហុងគ្រី អ៊ីតាលី លីទុយអានី ស៊ុយអែត ស្វីសនិងសហរដ្ឋអាមេរិក។ជនបរទេសជាង ៧០០នាក់ ត្រូវបានជម្លៀសពីអ៊ីរ៉ង់ ទៅកាន់អាស៊ែរបៃហ្សង់ និងអាមេនី៕