​​អាហ្វ្រិក​ខាងត្បូង៖ ប្រទេស​អាហ្វ្រិក​ខាងត្បូង​កំពុង​រៀបចំ​ព្រឹត្តិការណ៍​រយៈពេល​ ១​សប្តាហ៍​កាន់​មរណទុក្ខ​របស់​មេដឹកនាំ​ប្រឆាំង​ការរើស​អើងពូជសាសន៍​លោក Desmond Tutu ដែល​បានទទួល​មរណភាព​កាលពី​ថ្ងៃ​សៅរ៍​ក្នុង​អាយុ ៩០ឆ្នាំ​។ ​ជាមួយគ្នា​បណ្ដា​មេដឹកនាំ​ពិភព​លោក និង​សកម្មជន​សិទ្ធិមនុស្ស​ក៏បាន​ចូលរួម​គោរព​វិញ្ញាណក្ខន្ធ​ផងដែរ ​នៅតាម​បណ្ដាញ​សង្គម​ដល់​លោក Desmond Tutu ជា​ម្ចាស់​ពានរង្វាន់​ណូបែល​សន្តិភាព​របស់​អាហ្វ្រិក​ខាងត្បូងរូបនេះ​។

​នៅក្នុង​សេចក្តីថ្លែងការណ៍​មួយ​ដែល​ត្រូវបាន​បង្ហោះ​នៅលើ​ប្រព័ន្ធ​ផ្សព្វផ្សាយ​សង្គម នាយក​ប្រតិបត្តិ​នៃ​មជ្ឈមណ្ឌល Junior Martin Luther King លោក Bernice King បានសរសេរថា ខ្ញុំ​មានការ​សោកស្ដាយ​ដែល​បានទទួល​ដំណឹង​ពី​មរណភាព​របស់​អ្នកប្រាជ្ញ​ពិភពលោក មេដឹកនាំ​សិទ្ធិមនុស្ស និង​ធម្ម​យាត្រា​ដ៏​មាន​ឥទ្ធិពល​នៅលើ​ផែនដី​នេះ​។​ ​នាយករដ្ឋមន្ត្រី​អង់គ្លេស​លោក Boris Johnson បាន​ហៅ​លោក Tutu ថា​ជាមនុស្ស​សំខាន់​ក្នុងការ​ប្រយុទ្ធ​ប្រឆាំងនឹង​ការប្រកាន់​ពូជសាសន៍​។​ ​ប្រធានាធិបតី​បារាំង​លោក Emmanuel Macron ក៏បាន​ទទួលស្គាល់​ឥទ្ធិពល​របស់​ម្ចាស់​ពានរង្វាន់​ណូបែល​នេះ​ផងដែរ ក្នុងការ​បញ្ចប់​ការប្រកាន់​ពូជសាសន៍ ហើយ​បាន​និយាយថា លោក Tutu បាន​លះបង់​ជីវិត​របស់លោក​ដើម្បី​សិទ្ធិមនុស្ស និង​ភាព​ស្មើមុខស្មើមាត់​គ្នា​របស់​មនុស្ស​ទូទៅ​។​

​លោក Tutu បានធ្វើ​យុទ្ធនាការ​អន្តរជាតិ​សម្រាប់​សិទ្ធិមនុស្ស ជាពិសេស​សិទ្ធិ​អ្នក​ស្រឡាញ់​ភេទ​ដូចគ្នា និង​អាពាហ៍ពិពាហ៍​សម្រាប់​មនុ​ស្សមាន​ភេទ​ដូចគ្នា​។​ ​នៅ​ឆ្នាំ១៩៩៤ អតីត​ប្រធានាធិបតី​អាហ្វ្រិក​ខាងត្បូងដំបូង ដែល​បាន​កាន់អំណាចចន្លោះ​ពី​ឆ្នាំ១៩៩៤​ ដល់​ឆ្នាំ១៩៩៩ លោក Nelson Mandela បានតែងតាំងលោក Tutu ធ្វើជា​ប្រធាន​គណៈកម្មការ​ការពិត និង​ការផ្សះផ្សា ដែល​បាន​រកឃើញ​ការរំលោភបំពានលើ​ការរើសអើង​ពូជសាសន៍​ជា​ប្រព័ន្ធ។​ ​ម្ចាស់​ពានរង្វាន់​ណូបែល​សន្តិភាព Desmond Tutu រូបនេះដែល​ទទួលបាន​ការមើល​ថែ​ពី​ប្រពន្ធអាយុ ៦៦ឆ្នាំ ​និង​កូន ៤​​នាក់​របស់​ពួកគេត្រូវបាន​ចូល​សម្រាក​ព្យាបាល​ នៅ​មន្ទីរពេទ្យ​ជាច្រើនលើកចាប់តាំងពី​ឆ្នាំ២០១៥ មក បន្ទាប់ពី​លោកត្រូវបានធ្វើ​រោគវិនិច្ឆ័យ​ឃើញ​មាន​ជំងឺមហារីក​ក្រពេញ​ប្រូ​ស្តា​ត​ក្នុង​ឆ្នាំ១៩៩៧៕

អត្ថបទ៖ សុខមាន