ប្រធានាធិបតីសហរដ្ឋអាមេរិក លោក Donald Trump បានជួបពិភាក្សាជាមួយមេបញ្ជាការកងទ័ពប៉ាគីស្ថាន លោក Field Marshal Asim Munir នៅសេតវិមាន កាលពីថ្ងៃពុធ ទី១៨ ខែមិថុនា នៅក្នុងជំនួបដ៏កម្រមួយ ដែលបានបញ្ឆេះឱ្យមានជម្លោះជាថ្មីជាមួយប្រទេសឥណ្ឌា ជុំវិញការអះអាងរបស់លោក Trump ថា លោកបានជួយបញ្ឈប់សង្រ្គាមកាលពីពេលថ្មីៗនេះ រវាងគូប្រជែងនៅអាស៊ីខាងត្បូង។

ជំនួបនេះ គឺជាលើកដំបូងហើយ ដែលប្រធានាធិបតីសហរដ្ឋអាមេរិកបានទទួលមេបញ្ជាការកងទ័ពដ៏មានឥទ្ធិពលរបស់ប្រទេសប៉ាគីស្ថាន នៅឯសេតវិមានដោយគ្មានវត្តមានមន្ត្រីជាន់ខ្ពស់ស៊ីវិលរបស់ប៉ាគីស្ថាន។

លោក Trump បាននិយាយថា លោកបានពិភាក្សាពីបញ្ហាប្រទេសអ៊ីរ៉ង់ ដែលប៉ាគីស្ថាន ដឹងច្បាស់ភាគច្រើន។ លោក Trump បានអរគុណលោក Munir សម្រាប់ការបញ្ចប់សង្រ្គាមជាមួយប្រទេសឥណ្ឌា ហើយថែមទាំងបានសរសើរនាយករដ្ឋមន្រ្តីឥណ្ឌា លោក Narendra Modi ដែលលោកបានជួបសន្ទនាកាលពីយប់ថ្ងៃអង្គារ។

មន្ត្រីប៉ាគីស្ថាននិយាយថា លោក Munir ត្រូវបានគេរំពឹងថានឹងជំរុញឱ្យលោក Trump កុំចូលរួមទៅក្នុងជម្លោះរបស់អ៊ីស្រាអែលជាមួយអ៊ីរ៉ង់ ហើយជំនួសមកវិញឱ្យស្វែងរកបទឈប់បាញ់។

នៅពេលត្រូវបានសួរថាតើលោកសង្ឃឹមថានឹងទទួលបានអ្វីខ្លះពីជំនួបជាមួយលោក Munir លោក Trump បាននិយាយថា «ពិតណាស់ ខ្ញុំបានបញ្ឈប់សង្រ្គាម ខ្ញុំស្រលាញ់ប៉ាគីស្ថាន។ ខ្ញុំគិតថា លោក Modi គឺជាបុរសដ៏អស្ចារ្យម្នាក់។ ខ្ញុំបានសន្ទនាជាមួយគាត់កាលពីពេលយប់មិញ។ យើងនឹងបង្កើតកិច្ចព្រមព្រៀងពាណិជ្ជកម្មជាមួយ លោក Modi របស់ប្រទេសឥណ្ឌា» ។