រដ្ឋមន្ត្រីការបរទេសចិន លោក Wang Yi កាលពីថ្ងៃពុធ ទី១៨ មិថុនា បានព្រមានថា ការកើនឡើងអរិភាពរវាងអ៊ីស្រាអែល និងអ៊ីរ៉ង់ អាចរីករាលដាលមិនអាចគ្រប់គ្រងបាន ដោយជំរុញឱ្យភាគីទាំងអស់ ផ្តល់អាទិភាពដល់បទឈប់បាញ់ ដើម្បីទប់ស្កាត់តំបន់នេះមិនឲ្យធ្លាក់ចូលទៅក្នុង «អន្លង់ជ្រៅ»។

អ៊ីស្រាអែល និងអ៊ីរ៉ង់ បានបាញ់តបតគ្នា ដែលបង្កឱ្យមានការព្រួយបារម្ភពីជម្លោះអូសបន្លាយពេល ដែលអាចហ៊ុមព័ទ្ធនៅតំបន់មជ្ឈិមបូព៌ា។

លោក Wang បាននិយាយនៅក្នុងការសន្ទនាតាមទូរស័ព្ទជាមួយសមភាគីអេហ្ស៊ីប ថា «ចំណាត់ការរបស់អ៊ីស្រាអែលនៃការមិនគោរពច្បាប់អន្តរជាតិ បានធ្វើឱ្យស្ថានការណ៍នៅមជ្ឈិមបូព៌ាកាន់តែតានតឹង ហើយប្រទេសចិន ក៏មានការព្រួយបារម្ភយ៉ាងខ្លាំងថា ស្ថានភាពអាចនឹងហួសពីការគ្រប់គ្រង» នេះបើយោងតាមការចេញផ្សាយរបស់ក្រសួងការបរទេសចិន។

នៅក្នុងការអំពាវនាវដាច់ដោយឡែកមួយជាមួយរដ្ឋមន្ត្រីការបរទេសរបស់ប្រទេសអូម៉ង់ លោក Wang បាននិយាយថា ប្រទេសទាំងពីរ «មិនអាចអង្គុយនៅស្ងៀម ហើយទុកឱ្យតំបន់នេះ ធ្លាក់ចូលទៅក្នុងអន្លង់ជ្រៅដោយមិនដឹងខ្លួន» ហើយការឈានដល់កិច្ចព្រមព្រៀងបទឈប់បាញ់គឺជា «អាទិភាពកំពូល»។

ប្រទេសចិន និងមហាអំណាចពិភពលោកផ្សេងទៀត បានជំរុញឱ្យស្វែងរកការកាត់បន្ថយចំពោះអរិភាព ដែលបានផ្ទុះឡើង បន្ទាប់ពីអ៊ីស្រាអែលបានបើកការវាយប្រហារទ្រង់ទ្រាយធំលើប្រទេសអ៊ីរ៉ង់ កាលពីថ្ងៃសុក្រសប្តាហ៍មុន។ ទន្ទឹមនឹងនេះ សហរដ្ឋអាមេរិកបានអំពាវនាវឱ្យមាន «ការចុះចាញ់ដោយគ្មានលក្ខខណ្ឌ» របស់អ៊ីរ៉ង់ ដោយប្រធានាធិបតីសហរដ្ឋអាមេរិក លោក Donald Trump បាននិយាយថា ទីក្រុងវ៉ាស៊ីនតោន អាចនៅតែចូលរួមនៅក្នុងជម្លោះនេះ។ មេដឹកនាំកំពូលរបស់អ៊ីរ៉ង់ លោក Ayatollah Ali Khamenei បាននិយាយថា សាធារណរដ្ឋអ៊ីស្លាមមួយនេះនឹងមិនចុះចាញ់ឡើយ ហើយបានព្រមានសហរដ្ឋអាមេរិកអំពី «ការខូចខាតដែលមិនអាចជួសជុលបាន» ប្រសិនបើប្រទេសនេះធ្វើអន្តរាគមន៍។