លោកប្រធានាធិបតី Donald Trump បានធ្វើឱ្យពិភពលោកទស្សន៍ទាយថា តើសហរដ្ឋអាមេរិកនឹងចូលរួមការទម្លាក់គ្រាប់បែករបស់អ៊ីស្រាអែលលើទីតាំងនុយក្លេអ៊ែររបស់អ៊ីរ៉ង់ដែរឬយ៉ាងណា ខណៈជម្លោះអ៊ីស្រាអែល និងអ៊ីរ៉ង់ បានឈានចូលដល់ថ្ងៃទីប្រាំពីរ នៅថ្ងៃព្រហស្បតិ៍នេះ។

ថ្លែងទៅកាន់អ្នកសារព័ត៌មាននៅខាងក្រៅសេតវិមាន លោក Trump បានច្រានចោលមិននិយាយថាតើលោកបានធ្វើការសម្រេចចិត្តណាមួយជុំវិញថាតើត្រូវចូលរួមក្នុងយុទ្ធនាការរបស់អ៊ីស្រាអែលដែរឬយ៉ាងណា។ លោកនិយាយថា «ខ្ញុំអាចធ្វើ ឬ ប្រហែលជាខ្ញុំនឹងមិនធ្វើ។ ខ្ញុំចង់មានន័យថា គ្មាននរណាម្នាក់ដឹងពីអ្វីដែលខ្ញុំនឹងធ្វើ នោះទេ»។

នៅពេលក្រោយមក លោក Trump បាននិយាយថា មន្ត្រីអ៊ីរ៉ង់ចង់មកទីក្រុងវ៉ាស៊ីនតោនសម្រាប់កិច្ចប្រជុំមួយ។ ប៉ុន្តែលោកបាននិយាយបន្ថែមថា «វាយឺតពេលបន្តិចហើយ» សម្រាប់ការពិភាក្សាបែបនេះ។

ពលរដ្ឋអាមេរិក បាននិយាយទៅកាន់សារព័ត៌មាន Reuters ហើយបានបង្ហាញការមិនសប្បាយចិត្ត និងការខកចិត្តចំពោះសញ្ញាកើនឡើងដែលថា សហរដ្ឋអាមេរិកអាចត្រូវបានទាញឱ្យចូលកាន់តែជ្រៅទៅក្នុងជម្លោះរវាងអ៊ីស្រាអែល និងអ៊ីរ៉ង់។

អ៊ីស្រាអែល បានចាប់ផ្តើមសង្គ្រាមតាមអាកាសកាលពីថ្ងៃសុក្រ ទី១៣ មិថុនា ក្រោយពីបាននិយាយថា ខ្លួនបានសន្និដ្ឋានថា អ៊ីរ៉ង់ខិតទៅជិតដល់ការអភិវឌ្ឍអាវុធនុយក្លេអ៊ែរ។ ប៉ុន្តែអ៊ីរ៉ង់ បានបដិសេធមិនស្វែងរកអាវុធនុយក្លេអ៊ែរនោះទេ។