​បាល់ទាត់៖ ​ក្រុម​ជើងឯក​រង​ច្រើន​សម័យ​ជាងគេ​ឥណ្ឌូនេស៊ី​ បាន​ឈានឡើង​វគ្គ​ផ្តាច់ព្រ័ត្រ​ពានរង្វាន់ AFF Championship ជា​លើក​ទី​៦ ក្រោយ​ទំលាក់​ក្រុម​ម្ចាស់ផ្ទះ​សិង្ហ​បុរី​ក្នុង​ម៉ោង​បន្ថែម​កាត់សេចក្តី​។ ​​បន្ទាប់ពី​ស្មើគ្នា​ជើង​ទីមួយ ១-១ ក្រុម​ទាំងពីរ​មក​ស្មើគ្នា​ម្តងទៀត​នៅ​ជើង​ទី២ នេះ ២-២ ក្រោយ​ចប់ ៩០​នាទី​។

​​Ezra Walian បើក​ការ​នាំមុខ​ឱ្យ​ឥណ្ឌូនេស៊ី​នៅ​នាទី​ទី១១ មុនពេល​ដែល Ui-Young Song តាម​ស្មើ​វិញ​ឱ្យ​សិង្ហ​បុរី​នៅ​នាទី​ទី៤៥+៥ ទៅហើយ​។ ​​ឈានចូល​វគ្គ​ទី២ ម្ចាស់ផ្ទះ​ក៏​ទទួលបាន​កាត​ក្រហម​កីឡាករ Irfan Fandi តែ​មិន​ថ្វី​ទេគ្នា​តិចជាង​មែន​សិង្ហ​បុរី​ក៏​ស៊ុត​បាល់ Freekick នាំមុខ ២-១ នៅ​នាទី​ទី៧៤ ដោយ Shahdan Sulaiman​។​ ​យ៉ាងណាក្តី​មុន​ចប់​ការប្រកួត​ឥណ្ឌូនេស៊ី​ក៏​តាម​ស្មើ​បានសំរេច​នៅ​នាទី​ទី៨៧ ដោយ Pratama Arhan​។​ ​​ឈានដល់​វគ្គ​បន្ថែម ១៥នាទី​ពីរដង​ចាប់ផ្តើម​បានតែ ១នាទី​សិង្ហ​បុរី​ភ្លាត់​ចូល​ទី​ខ្លួនឯង​ដោយ Shawal Anuar មុនពេល​ដែល Egi Vikri ធានា​ជ័យជំនះ​នៅ​នាទី​ទី១០៥+២ ខណៈ​សិង្ហ​បុរី​បាត់បង់​កីឡាករ​ម្នាក់ទៀត​នៅ​នាទី​ទី១១៩ គឺ Hassan Sunny ទទួលបាន​កាត​ក្រហម​។

​​គ្រូបង្វឹក​ឥណ្ឌូនេស៊ី​លោក Shin Tae-Yong និយាយថា នេះ​ជាការ​ប្រកួត​ក្រឡាប់ចាក់​មួយ​ដែល​រួមផ្សំ​ទាំង​សំណាង និង​ស៊យ តែ​មិន​អី​ទេក្រុម​របស់លោក​ធ្វើបាន​សំរេច​នៅ​ទីបំផុត​។ ​​រីឯ​គ្រូបង្វឹក​សិង្ហ​បុរី​លោក Tatsuma Yoshida បាន​និយាយ​អរគុណ​ដល់​អ្នកគាំទ្រ និង​មិនមាន​អ្វី​បកស្រាយ​ចំពោះ​បរាជ័យ​ថ្ងៃនេះ កីឡាករ​ទាំងអស់​ប្រឹង​អស់ពី​លទ្ធភាព​ហើយ​។ ​​សូម​រំលឹកថា​ ឥណ្ឌូនេស៊ី​ជា​ក្រុម​ដែល​ឈានឡើង​វគ្គ​ផ្តាច់ព្រ័ត្រ​មិនដែល​ឈ្នះ​ចំនួន ៥លើក​មកហើយ ​ខណៈ​សិង្ហ​បុរី​ខក​ឱកាស​ឡើង​ប្រជែង​ជើងឯក​លើក​ទី៥ របស់ខ្លួន​៕

​អត្ថបទ​៖​នាង សុភា​វុ​ធ