​រុស្ស៊ី៖ លោក​ប្រធានាធិបតី Vladimir Putin បាន​និយាយ​កាលពី​ថ្ងៃអាទិត្យ​ថា ប្រសិនបើ​អង្គការ​ NATO មិន​ផ្តល់​ការធានា​ជាក់លាក់ ដើម្បីកាត់បន្ថយ​ការដាក់​ពង្រាយ​យោធា​នៅ​អឺរ៉ុប​ខាងកើត និង​រារាំង​អ៊ុយ​ក្រែ​ន​មិន​ឲ្យ​ចូល​ជា​សមាជិកភាព​ក្នុង​សម្ព័ន្ធភាព​ទេនោះ លោក​នឹងត្រូវបង្ខំ​ឱ្យ​ពិចារណា​ជម្រើស​ជា​ច្រើន រួមទាំង​ការឆ្លើយតប​ផ្នែក​យោធា​ផងដែរ​។​

​ការទាមទារ​របស់លោក Putin គឺមាន​នៅក្នុង​សេចក្តីព្រាង​សន្ធិសញ្ញា​ពីរ ​ដែល​រុស្ស៊ី​បាន​ដាក់​ទៅ​អង្គការ​ NATO ​កាលពី​ដើមខែ​នេះ​។​ សារព័ត៌មាន​ POLITICO បាន​រាយការណ៍​ថា លោក Putin ដែល​សុន្ទរកថា​របស់​លោក​បាន​ចាក់​ផ្សាយ​តាម​ទូរទស្សន៍​រដ្ឋ​រុស្ស៊ី​កាលពី​ថ្ងៃអាទិត្យ ​បាន​សម្តែង​ការ​ព្រួយ​បារម្ភ​អំពី​លទ្ធភាព​នៃ​ការ​ដាក់​ពង្រាយ​មី​ស៊ី​ល​នៅ​ក្នុង​ប្រទេស​អ៊ុយ​ក្រែ​ន ប្រសិនបើ​រដ្ឋ​ចំណុះ​អតីត​សហភាពសូវៀតមួយ​នេះ​ចូលរួម​ជាមួយ​អង្គការ NATO​។​ ​លោក Putin បាន​និយាយ​ថា យើង​គ្មាន​កន្លែង​ណា​ដែល​ត្រូវ​ដកថយ​ទេ។ ពួកគេ​បាន​រុញ​យើង​ទៅ​បន្ទាត់​មួយ​ដែល​យើង​មិន​អាច​ឆ្លងកាត់​បាន​។

ពួកគេ​បាន​យក​វា​ទៅ​ចំណុច​ដែល​យើង​ត្រូវ​ប្រាប់​ពួកគេ​ថា "​ឈប់​!"។ នឹង​អាស្រ័យ​លើ​សំណើ​អ្វី​ដែល​ក្រុម​អ្នក​ជំនាញ​យោធា​របស់​យើង​ដាក់​ជូន​រូបលោក។​ យោង​តាម​សារព័ត៌មាន The Washington Post អ្នកនាំពាក្យ​សេត​វិមានលោកស្រី Jen Psaki បាន​ប្រាប់​អ្នកយកព័ត៌មាន​ថា បណ្ដា​ប្រទេស​សមាជិក​ណា​តូ​ជា​អ្នក​សម្រេច​ចិត្ត​ថា ​អ្នកណា​ជា​សមាជិក​របស់ ​NATO ​មិនមែន​រុស្ស៊ី​ទេ។ ​អង្គការ ​NATO ទំនងជា​មិន​យល់ព្រម​តាម​លក្ខខណ្ឌ​របស់​លោក Putin​ ទេ​។ លោក​ប្រធានាធិបតី Biden បាន​គំរាម​បង្កើន​ទណ្ឌកម្ម ប្រសិនបើ​រុស្ស៊ី​ឈ្លានពាន​អ៊ុយក្រែ​ន​៕

អត្ថបទ៖ សុខមាន