អូឡាំពិក៖ លោក សោម សុទ្ធ នាយកអនុវិទ្យាល័យវត្តដំបូកខ្ពស់បានលើកឡើងថា សិស្សានុសិស្សបានបង្ហាញអារម្មណ៍សប្បាយរីករាយ ដែលគណៈកម្មាធិការជាតិអូឡាំពិកកម្ពុជា (NOCC) បានរៀបចំកម្មវិធីអប់រំគុណតម្លៃអូឡាំពិកជាថ្មីនៅសាលារបស់ខ្លួន ធ្វើឲ្យពួកគេបានយល់ដឹងច្រើនអំពីចលនាអូឡាំពិក ពិសេសដំណើរឆ្ពោះទៅស៊ីហ្គេម-អាស៊ានប៉ារ៉ាហ្គេមឆ្នាំ២០២៣ នៅកម្ពុជា។
ការគូសបញ្ជាក់នេះ បន្ទាប់ពីគណៈកម្មាធិការជាតិអូឡាំពិកកម្ពុជា បានរៀបចំកម្មវិធីអប់រំគុណតម្លៃអូឡាំពិកជាលើកទី២ នៅអនុវិទ្យាល័យវត្តដំបូកខ្ពស់កាលពីចុងសប្ដាហ៍កន្លងទៅ ក្រោមការធ្វើបទបង្ហាញរបស់លោក ប៊ុយ សុភ័ណ្ឌ ទីប្រឹក្សាគណៈកម្មាធិការជាតិអូឡាំពិកកម្ពុជា។ ជាមួយគ្នានោះ លោកក៏បានបញ្ជាប់នូវការផ្សព្វផ្សាយអំពីយុទ្ធនការជាតិ ឆ្ពោះទៅព្រឹត្តិការណ៍ជាប្រវត្តិសាស្ដ្រនាឆ្នាំ២០២៣ ផងដែរ។ លោក សោម សុទ្ធ បានបន្ថែមថា មានសិស្សានុសិស្សជាច្រើនបានចាប់អារម្មណ៍ចំពោះកម្មវិធីនេះ ហើយសាលាក៏តែងតែជំរុញពួកគេចូលរួមលេងកីឡា ស្របតាមកំណែទម្រង់របស់ក្រសួងអប់រំ យុវជន និងកីឡា ពិសេសប្រសាសន៍របស់សម្ដេចតេជោ ហ៊ុន សែន នាយករដ្ឋមន្ដ្រីនៃកម្ពុជា ដែលជំរុញឲ្យប្រជាពលរដ្ឋម្នាក់ "ត្រូវចេះលេងកីឡាមួយមុខ"។ ដូច្នេះលោកបានថ្លែងអំណរគុណគណៈកម្មាធិការជាតិអូឡាំពិកកម្ពុជា ដែលបានរៀបចំកម្មវិធីនេះនៅសាលារបស់លោក។
គួរបញ្ជាក់ថា នេះគឺជាលើកទី៣ ហើយដែលគណៈកម្មាធិការជាតិអូឡាំពិកកម្ពុជា បានរៀបចំកម្មវិធីអប់រំគុណតម្លៃអូឡាំពិកក្នុងឆ្នាំ២០២១ នេះ បន្ទាប់ពីរៀបចំ ២លើកមុននៅខេត្តកែប និងវិទ្យាល័យឬស្សីកែវ។ តែតាមគម្រោងគណៈកម្មាធិការជាតិអូឡាំពិកកម្ពុជា នឹងបន្ដរៀបចំកម្មវិធីនេះនៅតាមគ្រឹះស្ថានអប់រំមួយចំនួនទៀត ក្រោមកិច្ចសហការជាមួយក្រសួងអប់រំ ដើម្បីផ្សារភ្ជាប់ជាមួយការផ្សព្វផ្សាយយុទ្ធនាការឆ្ពោះទៅស៊ីហ្គេម-អាស៊ានប៉ារ៉ាហ្គេមឆ្នាំ២០២៣ នៅកម្ពុជា៕
អត្ថបទ៖ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
