រដ្ឋមន្ត្រីការពារជាតិអ៊ីស្រាអែល បាននិយាយនៅថ្ងៃព្រហស្បតិ៍នេះថា មេដឹកនាំកំពូលរបស់អ៊ីរ៉ង់ លោក Ayatollah Ali Khamenei នឹងត្រូវ«ទទួលខុសត្រូវ» បន្ទាប់ពីការវាយប្រហាររបស់អ៊ីរ៉ង់លើមន្ទីរពេទ្យ ក្នុងប្រទេសអ៊ីស្រាអែល ដោយបន្ថែមថា លោកបានបញ្ជាឲ្យកងទ័ព «បង្កើនការវាយប្រហារ» ទៅលើសាធារណរដ្ឋឥស្លាម។

លោក Israel Katz បាននិយាយថា៖«ទាំងនេះ គឺជាឧក្រិដ្ឋកម្មសង្គ្រាមដ៏ធ្ងន់ធ្ងរបំផុតមួយចំនួន ហើយលោក Khamenei នឹងត្រូវទទួលខុសត្រូវចំពោះសកម្មភាពរបស់ខ្លួន» ដោយបន្ថែមថា លោក និងនាយករដ្ឋមន្ត្រី បានបញ្ជាឲ្យយោធា «បង្កើនការវាយប្រហារប្រឆាំងនឹងគោលដៅយុទ្ធសាស្ត្រ នៅក្នុងប្រទេសអ៊ីរ៉ង់ និងប្រឆាំងនឹងហេដ្ឋារចនាសម្ព័ន្ធថាមពល នៅក្នុងទីក្រុងតេអេរ៉ង់ ដើម្បីបញ្ឈប់ការគំរាមកំហែងដល់រដ្ឋអ៊ីស្រាអែល និងធ្វើឲ្យរបបរបស់លោក Ayatollahs រង្គោះរង្គើ»។

យោងតាមមជ្ឈមណ្ឌលវេជ្ជសាស្ត្របានឲ្យដឹងថា មីស៊ីលអ៊ីរ៉ង់មួយគ្រាប់ បានវាយប្រហារទៅលើមន្ទីរពេទ្យធំនៅភាគខាងត្បូងប្រទេសអ៊ីស្រាអែល នៅព្រឹកថ្ងៃព្រហស្បតិ៍នេះ ដោយបានបង្កឲ្យមនុស្សរងរបួស និង  បណ្តាលឲ្យ «ខូចខាតយ៉ាងធ្ងន់ធ្ងរ»។ ប្រព័ន្ធផ្សព្វផ្សាយអ៊ីស្រាអែល បានចាក់ផ្សាយវីដេអូនៃបង្អួចដែលផ្ទុះចេញ និងមានផ្សែងខ្មៅខ្មួលខ្មាញ់ហោះទៅលើអាកាស។

មីស៊ីលមួយគ្រាប់ទៀត បានវាយប្រហារអគារខ្ពស់មួយ និងអគារលំនៅឋានជាច្រើនទៀត នៅក្នុងទីតាំងយ៉ាងហោចណាស់ពីរកន្លែងក្បែរទីក្រុងតែលអាវីវ (Tel Aviv)។ យោងតាមសេវាជួយសង្គ្រោះ Magen David Adom របស់អ៊ីស្រាអែល បានឲ្យដឹងថា យ៉ាងហោចណាស់មនុស្ស ៤០នាក់ បានរងរបួស នៅក្នុងការវាយប្រហារនេះ។

ទន្ទឹមនឹងនេះ អ៊ីស្រាអែលបានធ្វើការវាយប្រហារលើម៉ាស៊ីនរ៉េអាក់ទ័រទឹកធុនធ្ងន់ Arak របស់អ៊ីរ៉ង់ នៅក្នុងការវាយប្រហារចុងក្រោយបំផុតរបស់ខ្លួនលើកម្មវិធីនុយក្លេអ៊ែរដ៏ធំទូលាយរបស់ប្រទេសនេះ នៅថ្ងៃទី ០៧ នៃជម្លោះ ដែលបានចាប់ផ្តើមជាមួយនឹងរលកដ៏គួរឲ្យភ្ញាក់ផ្អើលនៃការវាយប្រហារតាមអាកាសរបស់អ៊ីស្រាអែល សំដៅលើទីតាំងយោធា មន្ត្រីជាន់ខ្ពស់ និងអ្នកវិទ្យាសាស្ត្រនុយក្លេអ៊ែរ។