នាវាទេសចរណ៍ដែលត្រៀមដឹកជញ្ជូនពលរដ្ឋអ៊ីស្រាអែលជាប់ខ្លួនរាប់រយនាក់ បានចូលចតនៅទីក្រុង Limassol ស្ថិតនៅតំបន់ឆ្នេរភាគខាងត្បូងប្រទេសស៊ីបនាថ្ងៃព្រហស្បតិ៍នេះ ស្របពេលដែលដែនអាកាសលើប្រទេសអ៊ីស្រាអែល និងតំបន់មជ្ឈិមបូព៌ា បានបិទ ខណៈកើតមានសង្រ្គាមតាមច្រកអាកាសរវាងអ៊ីស្រាអែល និងអ៊ីរ៉ង់ ។

កាលពីថ្ងៃពុធ នាវាទេសចរណ៍តែមួយ បានដឹកអ្នកជម្លៀសខ្លួនចេញពីអ៊ីស្រាអែលទៅកាន់រដ្ឋធានី Larnaca របស់ប្រទេសស៊ីប ក្រោយពេលអ្នកដំណើររាប់ពាន់នាក់ បានជាប់ខ្លួន ដោយសារការបិទដែនអាកាសអ៊ីស្រាអែល ខណៈជម្លោះកាន់តែឡើងកម្តៅខ្លាំងជាមួយអ៊ីរ៉ង់ ។

គួរឲ្យដឹងថា អ៊ីស្រាអែល បានបើកការវាយប្រហារតាមច្រកអាកាសលើអ៊ីរ៉ង់កាលពីថ្ងៃសុក្រសប្តាហ៍មុន ក្រោយពួកគេធ្វើការសន្និដ្ឋានថា ទីក្រុងតេអេរ៉ង់ជិតផលិតអាវុធនុយក្លេអ៊ែរ ។

អ៊ីរ៉ង់ច្រានចោលការស្វែងរកអាវុធនុយក្លេអ៊ែរ ហើយនិងបញ្ជាក់ថា ពួកគេមានសិទ្ធិក្នុងការទទួលបានបច្ចេកវិទ្យានុយក្លេអ៊ែរ សម្រាប់គោលបំណងសន្តិភាព រួមទាំងការចម្រាញ់សារធាតុអ៊ុយរ៉ានីញ៉ូម ដែលជាផ្នែកមួយនៃកិច្ចព្រមព្រៀងមិនរីកសាយភាយអាវុធនុយក្លេអ៊ែរ ។

រយៈពេលជិត ១សប្តាហ៍នៃការវាយប្រហារមីស៊ីល និងតាមច្រកអាកាសរបស់អ៊ីស្រាអែលលើគូប្រជែងធំរបស់ខ្លួន បានសម្លាប់មេបញ្ជាការជាន់ខ្ពស់ និងក្រុមអ្នកវិទ្យាសាស្រ្តនុយក្លេអ៊ែរអ៊ីរ៉ង់ ធ្វើខូចខាតសមត្ថភាពនុយក្លេអ៊ែររបស់ពួកគេ និងបានសម្លាប់មនុស្សរាប់រយនាក់ ខណៈការវាយប្រហារសងសឹករបស់អ៊ីរ៉ង់ បានសម្លាប់ជនស៊ីវិរាប់សិបនាក់នៅអ៊ីស្រាអែល ៕