រដ្ឋមន្ត្រីការពារជាតិ លោក Yasar Guler បាននិយាយកាលពីថ្ងៃពុធថា ប្រទេសទួរគី បានបង្កើនវិធានការសន្តិសុខ នៅតាមព្រំដែនរបស់ខ្លួន ចំពេលមានភាពតានតឹងកើនឡើង នៅក្នុងតំបន់ បន្ទាប់ពីមានអរិភាពនាពេលថ្មីៗនេះ រវាងអ៊ីរ៉ង់ និងអ៊ីស្រាអែល។

លោក Guler បាននិយាយក្នុងអំឡុងពេលទស្សនកិច្ចនៅខេត្ត Van ដែលជាប់ព្រំដែនភាគខាងកើតថា៖   «វិធានការសន្តិសុខនៅព្រំដែនរបស់យើង ត្រូវបានបង្កើនឡើង ដោយសារឧប្បត្តិហេតុថ្មីៗនេះ នៅក្នុងប្រទេសអ៊ីរ៉ង់ដែលនៅជិតខាង។

ថ្លែងនៅក្នុងសន្និសិទតាមវីដេអូជាមួយមេបញ្ជាការមកពីទីបញ្ជាការកងទ័ពទី៣ លោក Guler បាននិយាយថា ទួរគីនឹងរក្សាបាននូវស្ថានភាពសន្តិសុខតាមព្រំដែនដែលមានកម្រិតខ្ពស់ ស្របពេលការវិវឌ្ឍកំពុងវបន្ត។ 

លោក Guler ក៏បានធ្វើអត្ថាធិប្បាយអំពីសកម្មភាពយោធារបស់អ៊ីស្រាអែលផងដែរ ដោយនិយាយថា ប្រទេសទួរគី បានថ្កោលទោសការវាយប្រហារនាពេលថ្មីៗនេះ លើអ៊ីរ៉ង់។ លោកបានលើកឡើងថា៖«យើងថ្កោលទោសការវាយប្រហារ ដែលអ៊ីស្រាអែលបានធ្វើឡើងប្រឆាំងនឹងប្រទេសជិតខាងរបស់យើង គឺអ៊ីរ៉ង់កាលពីថ្ងៃសុក្រសប្តាហ៍មុន។ លោកបានបន្ថែមថា ប្រតិបត្តិការពីមុនៗនៅតំបន់ហ្កាហ្សា និងលីបង់ បង្ហាញពីហានិភ័យនៃការកើនឡើងភានតឹងក្នុងតំបន់កាន់តែធំឡើង»។ 

លោកបានជំរុញឲ្យសហគមន៍អន្តរជាតិដោះស្រាយអ្វីដែលលោកពណ៌នាថា ជាការមិនយកចិត្តទុកដាក់របស់អ៊ីស្រាអែល ចំពោះការរិះគន់ពីអន្តរជាតិ និងក្នុងស្រុក។