ប្រទេសរ៉្វាន់ដា និងសាធារណរដ្ឋប្រជាធិបតេយ្យកុងហ្គោ រួមជាមួយសហរដ្ឋអាមេរិក កាលពីថ្ងៃពុធ (ទី១៩ ខែមិថុនា) បានប្រាប់ឲ្យដឹងថា ក្រុមបច្ចេកទេសនៃប្រទេសអាហ្វ្រិកទាំង២ បានចាប់ផ្តើមសេចក្តីព្រាងកិច្ចព្រមព្រៀងសន្តិភាពដែលត្រូវបានគេរំពឹងថា នឹងមានការចុះហត្ថលេខា នៅសប្តាហ៍ក្រោយនេះ ជាកិច្ចប្រឹងប្រែង ដែលត្រូវបានធ្វើឡើងក្នុងគោលបំណងបញ្ចប់ការប្រយុទ្ធគ្នា នៅភាគខាងកើតកុងហ្គោ។

កិច្ចព្រមព្រៀងបណ្ដោះអាសន្នដែលត្រូវបានប្រកាសនៅក្នុងសេចក្តីថ្លែងការណ៍រួម អាចជាការបំបែកភាពទាល់ច្រកក្នុងកិច្ចពិភាក្សាដែលត្រូវបានធ្វើឡើងដោយរដ្ឋបាលរបស់ប្រធានាធិបតីអាមេរិក លោក Donald Trump ដើម្បីបញ្ចប់ការប្រយុទ្ធគ្នានៅភាគខាងកើតកុងហ្គោ និងនាំឲ្យមានការវិនិយោគរបស់លោកខាងលិចរាប់ពាន់លានដុល្លារ នៅតំបន់ដែលសម្បូរទៅដោយធនធានរ៉ែផ្សេងៗជាច្រើន។

យោងតាមសេចក្តីថ្លែងការណ៍នោះ បានឲ្យដឹងថា កិច្ចព្រមព្រៀងបណ្តោះអាសន្នដែលសម្រេចបានបន្ទាប់ពីមានកិច្ចពិភាក្សារយៈពេល ៣ថ្ងៃ ដោះស្រាយបញ្ហាបូរណភាពដែនដី និងការហាមប្រាមមិនឲ្យកើតអរិភាព និងការផ្តាច់ខ្លួន ការរំសាយអាវុធ និងសមាហរណកម្មតាមលក្ខខណ្ឌនៃក្រុមប្រដាប់អាវុធមិនមែនរដ្ឋ។

កិច្ចព្រមព្រៀងនេះ ក៏រួមបញ្ចូលផងដែរនូវបទប្បញ្ញត្តិ ស្តីពីការបង្កើតយន្តការសន្តិសុខរួមគ្នាដែលរួមបញ្ចូលនូវសំណើដែលត្រូវបានពិភាក្សាដោយភាគីនានា កាលពីឆ្នាំមុន ក្រោមការសម្របសម្រួលរបស់ប្រទេសអង់ហ្គោឡា។ ការចុះហត្ថលេខាកម្រិតរដ្ឋមន្ត្រី គ្រោងធ្វើនៅថ្ងៃទី២៧ ខែមិថុនា។

ការប្រយុទ្ធគ្នានៅភាគខាងកើតកុងហ្គោ បានកើនឡើងនៅឆ្នាំនេះ ខណៈដែលក្រុមឧទ្ទាម M23 ដែលគាំទ្រដោយរ៉្វាន់ដា បានចាប់ផ្តើមរុលទៅមុខ ដែលបានមើលឃើញថា ក្រុមនេះបានដណ្តើមកាន់កាប់ទីក្រុងធំជាងគេចំនួន ២ ក្នុងតំបន់នេះ ដោយបានធ្វើឲ្យមានការភ័យខ្លាចកាន់តែខ្លាំងឡើងៗ ដែលថា ជម្លោះរីកកាន់តែធំទីៗ៕