វិមានក្រឹមឡាំង បានប្រាប់ឲ្យដឹងថា ប្រធានាធិបតីរុស្ស៊ី លោក Vladimir Putin និងប្រធានាធិបតីចិន លោក ស៊ី ជីនពីង (Xi Jinping) បានជជែកគ្នាតាមទូរសព្ទ នៅថ្ងៃព្រហស្បតិ៍ (ទី១៩ ខែមិថុនា) ជាពេលដែលមេដឹកនាំទាំង២ បានថ្កោលទោសអ៊ីស្រាអែល ចំពោះការវាយប្រហារលើអ៊ីរ៉ង់ និងបានយល់ព្រមថា ការកាត់បន្ថយភាពតានតឹង គឺចាំបាច់។

ជំនួយការរបស់វិមានក្រឹមឡាំង លោក Yuri Ushakov បានប្រាប់អ្នកសារព័ត៌មានថា មេដឹកនាំទាំង២ «ថ្កោលទោសយ៉ាងខ្លាំង ចំពោះសកម្មភាពរបស់អ៊ីស្រាអែល ដែលបំពានលើធម្មនុញ្ញអង្គការសហប្រជាជាតិ (UN) និងបទដ្ឋានផ្សេងទៀតនៃច្បាប់អន្តរជាតិ»។

លោក Ushakov បាននិយាយថា៖ «ទាំងទីក្រុងមូស្គូ និងទីក្រុងប៉េកាំង ជឿជាក់យ៉ាងមុតមាំថា មិនត្រូវមានដំណោះស្រាយយោធា ចំពោះស្ថានការណ៍បច្ចុប្បន្ន និងបញ្ហាទាក់ទងនឹងកម្មវិធីនុយក្លេអ៊ែររបស់អ៊ីរ៉ង់នោះឡើយ។ ដំណោះស្រាយត្រូវតែសម្រេចបានទាំងស្រុង តាមរយៈមធ្យោបាយនយោបាយ និងការទូត»។

រុស្ស៊ីបានព្រមានពីការមានមហន្តរាយ ប្រសិនបើជម្លោះអ៊ីស្រាអែល និងអ៊ីរ៉ង់ ដែលពេលនេះឈានដល់ថ្ងៃទី៧ហើយនោះ កាន់តែតានតឹង ហើយបានជំរុញឲ្យសហរដ្ឋអាមេរិកកុំចូលរួមជាមួយយុទ្ធនាការទម្លាក់គ្រាប់បែករបស់អ៊ីស្រាអែល។

នៅថ្ងៃព្រហស្បតិ៍នេះ លោក Putin បានបញ្ជាក់ជាថ្មីនូវសំណើធ្វើជាអ្នកសម្របសម្រួល ក្នុងជម្លោះអ៊ីស្រាអែល-អ៊ីសរ៉ង់ អំឡុងការជជែកតាមទូរសព្ទជាមួយលោក ស៊ី ដែលជាសម្ព័ន្ធមិត្តជិតស្និទ្ធរបស់លោក។ ហើយលោក Ushakov បានបញ្ជាក់ថា មេដឹកនាំចិនបានសម្តែងការគាំទ្រ ចំពោះគំនិតនេះ ខណៈដែលលោកជឿថា កិច្ចប្រឹងប្រែងនោះអាចជួយកាត់បន្ថយស្ថានភាពធ្ងន់ធ្ងរនាពេលនេះ។ ជំនួយការវិមានក្រឹមឡាំងបានបន្ថែមថា មេដឹកនាំទាំង២ បានយល់ស្របបន្តទំនាក់ទំនងជិតស្និទ្ធជាប់ជានិច្ច៕