​

នាយករដ្ឋមន្ត្រីប៊ុលហ្គារី លោក Rosen Zhelyazkov នៅថ្ងៃព្រហស្បតិ៍ (ទី១៩ ខែមិថុនា) នេះ បានប្រាប់ប្រព័ន្ធផ្សព្វផ្សាយក្នុងស្រុកថា ប្រទេសប៊ុលហ្គារីបានបិទស្ថានទូតរបស់ខ្លួន នៅទីក្រុងតេអេរ៉ង់ ហើយបានជម្លៀសបុគ្គលិកទូត និងក្រុមគ្រួសាររបស់ពួកគេទៅកាន់ប្រទេសជិតខាងអាស៊ែបៃហ្សង់ ខណៈដែលជម្លោះ រវាងអ៊ីរ៉ង់ និងអ៊ីស្រាអែល កាន់តែតានតឹងខ្លាំងឡើងៗ។

លោក Zhelyazkov បាននិយាយថា មនុស្ស ១២នាក់ មកពីស្ថានទូត និងក្រុមគ្រួសាររបស់ពួកគេ ត្រូវបានជម្លៀសចេញ បន្ទាប់ពីអ៊ីស្រាអែលបានណែនាំឲ្យអ្នកស្រុកជម្លៀសចេញពីសង្កាត់ទី៣ នៃទីក្រុងតេអេរ៉ង់។

លោកបានប្រាប់ថា៖ «ស្ថានទូតប៊ុលហ្គារីមានទីតាំងកៀកណាស់នឹងតំបន់នេះ ហើយយើងបានសម្រេចឲ្យអ្នកការទូតរបស់យើងចាកចេញពីប្រទេសនេះ»។ លោកបានបញ្ជាក់ថា ស្ថានទូតនឹងបន្តប្រតិបត្តិការពីទីក្រុងបាគូ។

លោកបានឲ្យដឹងបន្ថែមថា បុគ្គលិកបានជិះរថយន្តរយៈពេល ៦ម៉ោង ឆ្ពោះទៅព្រំដែន ហើយពួកគេត្រូវរង់ចាំ ៦ម៉ោងទៀត ដោយសារតែពិនិត្យនៅព្រំដែន៕