រមាសខ្មៅជិតផុតពូជចំនួន ១០ក្បាល ត្រូវបានបំលាស់ទីដោយជោគជ័យចេញពីអាហ្វ្រិកខាងត្បូង ទៅកាន់ឧទ្យានជាតិ Zinave របស់ប្រទេសម៉ូសំប៊ិក គឺជាអ្វីដែលក្រុមអភិរក្សនិយមចាត់ទុកថា ជាព្រឹត្តការណ៍សំខាន់ក្នុងកិច្ចខិតខំអភិរក្សាសត្វព្រៃក្នុងតំបន់ ។

ប្រតិបត្តិការដែលជាការសម្របសម្រួលរវាងក្រុមអាជ្ញាធរអាហ្វ្រិកខាងត្បូង និងម៉ូសំប៊ិកជាមួយមូលនិធិឧទ្យានសន្តិភាពនេះ មានគោលដៅបង្កើតចំនួនបង្កាត់ពូជសត្វរមាសខ្មៅលើកដំបូងនៅម៉ូសំប៊ិក ក្នុងរយៈពេលជាង ៥០ឆ្នាំ ។

លោក Kester Vickery គឺជាស្ថាបនិកបង្កើតគ្រឹះស្ថានដំណោះស្រាយអភិរក្ស(Conservation Solutions) និយាយថា ប្រទេសម៉ូសំប៊ិកមានរមាសខ្មៅតិចជាង ២០ក្បាលប៉ុណ្ណោះ ខណៈដែលអាហ្វ្រិកខាងត្បូងមានរមាសខ្មៅជិតផុតពូជយ៉ាងច្រើន ហើយគោលបំណងមួយក្នុងចំណោមគោលបំណងសំខាន់របស់ពួកយើងនៅពេលនេះ គឺព្យាយាមនាំយកសត្វព្រៃមួយចំនួនពីអាហ្វ្រិកខាងត្បូង មកកាន់ឧទ្យានដែលមានការការពារបានយ៉ាងល្អ នៅប្រទេសម៉ូសំប៊ិក គឺឧទ្យានជាតិ Zenavi ។

រមាសខ្មៅទាំងនេះ ត្រូវបានបញ្ជូនយ៉ាងប្រុងប្រយ័ត្ន កាត់ស្នែងវាចេញ សម្រាប់ការការពារវា ហើយនិងដឹកជញ្ជូនតាមរទេះពិសេស អំឡុងការធ្វើដំណើររយៈពេល ៤៨មោងពីឧទ្យាន Hluhluwe iMfolozi របស់អាហ្វ្រិកខាងត្បូង ទៅកាន់ឧទ្យានជាតិ Zinave ។

ការបន្ថែមរមាសខ្មៅទាំង ១០ក្បាលនេះ នឹងធ្វើឲ្យចំនួនរមាសខ្មៅនៅក្នុងឧទ្យាន Zinave កើនឡើងជាង ២០ក្បាល គឺជាចំនួនមួយដែលគេគិតថាសំខាន់សម្រាប់ភាពសម្បូរបែបនៃហ្សែន និងលទ្ធភាពជោគជ័យយូរអង្វែងរបស់វា ។

លោក Antony Alexander គឺជាអ្នកគ្រប់គ្រងកម្មវិធីនៅមូលនិធិឧទ្យានសន្តិភាព និយាយថា រមាសខ្មៅពិតជាពិសេសខ្លាំងណាស់ ។ ពួកវាកម្រ និងជិតផុតពូជជាងរមាសស. ៕