ប្រធានាធិបតីអាមេរិក លោក Donald Trump កាលពីថ្ងៃព្រហស្បតិ៍ (១៩ មិថុនា) បានបន្ថែមពេលផុតកំណត់រហូតដល់ថ្ងៃទី១៧ ខែកញ្ញា សម្រាប់ក្រុមហ៊ុន ByteDance ដែលមានមូលដ្ឋាននៅប្រទេសចិន ដើម្បីចាត់ចែងលក់ទ្រព្យសម្បត្តិនៃកម្មវិធីវីដេអូខ្លី TikTok របស់ខ្លួននៅសហរដ្ឋអាមេរិក ខណៈច្បាប់ហាមប្រាម ដែលកំណត់ការលក់ ឬបិទដំណើរនៃអេបនេះ ហាក់មិនដើរទៅមុខទាល់តែសោះ។

លោក Trump ចុះហត្ថលេខាលើក្រឹត្យមួយ ដោយរុញកាលបរិច្ឆេទកំណត់នៅថ្ងៃព្រហស្បតិ៍សប្ដាហ៍នេះ ឱ្យបន្តរយៈពេល ៩០ថ្ងៃទៅមុខទៀត នៅក្នុងជំហានមួយដែលលោកធ្លាប់បានផ្តល់សញ្ញារួចហើយថានឹងធ្វើឡើង។ ប្រធានាធិបតីមកពីបក្សសាធារណរដ្ឋរូបនេះ បានផ្តល់ការសង្រ្គោះចំនួនពីរលើករួចមកហើយពីការអនុវត្តច្បាប់សហព័ន្ធ ដែលតម្រូវឱ្យលក់ ឬបិទដំណើរការ TikTok ដែលត្រូវសន្មត់ថានឹងចូលជាធរមានក្នុងខែមករាឆ្នាំនេះ ប្រសិនបើពុំមានវឌ្ឈនភាពចំពោះការលក់ចេញ។

លោក Trump និយាយថា លោកចង់រក្សាទុកកម្មវិធីនេះ ដែលបានជួយលោកទាក់ទាញម្ចាស់ឆ្នោតវ័យក្មេង ក្នុងការបោះឆ្នោតប្រធានាធិបតីអាមេរិកឆ្នាំ២០២៤ កន្លងទៅ។ លោកក៏បានសម្តែងសុទិដ្ឋិនិយមថា ប្រធានាធិបតីចិន លោក Xi Jinping នឹងយល់ព្រមលើកិច្ចព្រមព្រៀងមួយដែលរក្សាទុកកម្មវិធីនេះ ទោះបីជាមិនច្បាស់ថា តើប្រធានបទនេះត្រូវលើកឡើងជាពិសេសដែរឬទេ ក្នុងកិច្ចពិភាក្សាកំពុងបន្តរបស់ប្រទេសទាំងពីរដើម្បីដោះស្រាយជម្លោះពន្ធ។

គួររម្លឹកថា ច្បាប់ហាមប្រាមឆ្នាំ២០២៤ តម្រូវឱ្យ TikTok ឈប់ដំណើរការត្រឹមថ្ងៃទី១៩ ខែមករា ឆ្នាំ២០២៥នេះ លុះត្រាតែក្រុមហ៊ុនមេចិនរបស់ TikTok គឺ ByteDance បានបញ្ចប់ការលក់ទ្រព្យសម្បត្តិរបស់កម្មវិធីមួយនេះនៅអាមេរិក ឬក៏បង្ហាញពីវឌ្ឍនភាពសំខាន់ៗឆ្ពោះទៅរកការលក់របស់ខ្លួន៕