ប្រទេសរុស្ស៊ីកាលពីថ្ងៃព្រហស្បតិ៍សប្ដាហ៍នេះ បានព្រមានសហរដ្ឋអាមេរិកកុំឱ្យចាត់វិធានការយោធាប្រឆាំងនឹងអ៊ីរ៉ង់ឲ្យសោះ ស្របពេលមានការរំពឹងទុកថាតើ ទីក្រុងវ៉ាស៊ីនតោន នឹងលូកចូលទៅក្នុងសង្រ្គាមជាមួយអ៊ីស្រាអែលដែរឬទេ។

អ៊ីស្រាអែល បានចាប់ផ្តើមការវាយប្រហារមិនធ្លាប់មានលើប្រទេសអ៊ីរ៉ង់កាលពីថ្ងៃសុក្រសប្តាហ៍មុន ដែលទីក្រុងតេអេរ៉ង់បានឆ្លើយតបការវាយប្រហារដោយមីស៊ីល និងយានដ្រូន ឈានដល់ការសម្លាប់មនុស្សជាច្រើននៃភាគីទាំងពីរ។

ទីក្រុងមូស្គូ គឺជាសម្ព័ន្ធមិត្តដ៏សំខាន់បំផុតមួយរបស់អ៊ីរ៉ង់ ជាមួយនឹងកិច្ចសហប្រតិបត្តិការយោធាកាន់តែស៊ីជម្រៅ និងចុះហត្ថលេខាលើកិច្ចព្រមព្រៀងភាពជាដៃគូយុទ្ធសាស្ត្រកាលពីប៉ុន្មានខែមុន។

ប៉ុន្តែវិមានក្រឹមឡាំង ពុំបានផ្តល់ការគាំទ្រផ្នែកយោធាដល់អ៊ីរ៉ង់នៅចំពោះមុខការវាយប្រហារតាមអាកាសរបស់អ៊ីស្រាអែលទេ ហើយលោកប្រធានាធិបតី Vladimir Putin កំពុងចងភ្ជាប់ខ្លួនលោកជាអ្នកសម្របសម្រួលដែលអាចធ្វើបាន ដោយលោកថ្កោលទោសអ៊ីស្រាអែល។

អ្នកនាំពាក្យក្រសួងការបរទេសរុស្ស៊ី លោកស្រី Maria Zakharova បានប្រាប់អ្នកយកព័ត៌មានថារុស្ស៊ី ចង់ព្រមានជាពិសេសលើទីក្រុងវ៉ាស៊ីនតោន ប្រឆាំងនឹងអន្តរាគមន៍យោធាក្នុងស្ថានភាពពេលនេះ។

ប្រធានាធិបតីអាមេរិក លោក Donald Trump បាននិយាយកាលពីថ្ងៃពុធសប្ដាហ៍នេះ ថា លោកកំពុងពិចារណាចូលរួមការវាយប្រហាររបស់អ៊ីស្រាអែលលើអ៊ីរ៉ង់ ស្របពេលអ៊ីស្រាអែល កំពុងព្យាយាមបញ្ចុះបញ្ចូលអាមេរិកឲ្យជួយខ្លួនក្នុងការលុបបំបាត់កម្មវិធីនុយក្លេអ៊ែររបស់ទីក្រុងតេអេរ៉ង់៕