លោក Xi Jinping ប្រធានាធិបតីចិន បាននិយាយកាលពីថ្ងៃព្រហស្បតិ៍សប្ដាហ៍នេះ ថាបទឈប់បាញ់ត្រូវតែជាអាទិភាពបន្ទាន់មួយនៅមជ្ឈិមបូព៌ា។លោកPutin និងលោក Xi ថ្កោលទោសយ៉ាងខ្លាំងចំពោះការវាយប្រហាររបស់អ៊ីស្រាអែលលើអ៊ីរ៉ង់ដោយជំរុញឱ្យមានការបន្ធូរបន្ថយស្ថានការណ៍។ 

លោកXiបានកត់សម្គាល់បែបនេះ អំឡុងសន្ទនាតាមទូរស័ព្ទជាមួយប្រធានាធិបតីរុស្ស៊ី Vladimir Putin ដោយមេដឹកនាំទាំងពីរ បានផ្លាស់ប្តូរទស្សនៈទាក់ទងនឹងស្ថានភាពនៅមជ្ឈិមបូព៌ា។  

លោក Xi បានគូសបញ្ជាក់ពីគោលការណ៍ និងគោលជំហររបស់ប្រទេសចិន ដោយនិយាយថា ស្ថានភាពមជ្ឈិមបូព៌ាបច្ចុប្បន្នគឺមានគ្រោះថ្នាក់ខ្លាំង ដែលបញ្ជាក់បន្ថែមថាពិភពលោកកំពុងឈានចូលដល់ដំណាក់កាលថ្មីនៃភាពចលាចល និងការផ្លាស់ប្តូរ។

លោកXiនិយាយថាបើជម្លោះនៅតែបន្តកើនឡើង មិនត្រឹមតែភាគីពាក់ព័ន្ធផ្ទាល់នឹងទទួលរងការខាតបង់កាន់តែច្រើនប៉ុណ្ណោះទេ ប៉ុន្តែបណ្តាប្រទេសនៅទូទាំងតំបន់ក៏នឹងរងផលប៉ះពាល់យ៉ាងធ្ងន់ធ្ងរផងដែរ។លោកថ្លែងថាការប្រើកម្លាំងមិនមែនជាវិធីត្រឹមត្រូវក្នុងការដោះស្រាយជម្លោះអន្តរជាតិទេ ផ្ទុយទៅវិញវារឹងរឹតតែ ដុតបញ្ឆេះឱ្យមានការស្អប់ខ្ពើមនិងការប្រឈមមុខដាក់គ្នា កាន់តែខ្លាំងថែមទៀត។ 

លោក Xi បាននិយាយថា ភាគីពាក់ព័ន្ធក្នុងជម្លោះ ជាពិសេសអ៊ីស្រាអែល គួរតែបញ្ឈប់ប្រតិបត្តិការយោធាឱ្យបានឆាប់តាមដែលអាចធ្វើទៅបាន ដើម្បីទប់ស្កាត់ការកើនឡើងនៃជម្លោះ និងដើម្បីជៀសវាងយ៉ាងម៉ឺងម៉ាត់នូវការរីករាលដាលនៃសង្រ្គាមហៀរចេះពីតំបន់នេះ។ 

ការសន្ទនានេះក៏បានលើកឡើងពីកិច្ចប្រជុំកំពូលG7ផងដែរ ដោយមេដឹកនាំទាំងពីរត្រូវបានគេរាយការណ៍ថាបានកត់សម្គាល់ពីភាពតានតឹងក្នុងចំណោមអ្នកចូលរួម។ លោក Putinនិងលោក Xi បានចាត់ទុកជំនួបកំពូលនេះថា ជាពេលវេលាមិនជោគជ័យសម្រាប់ប្រធានាធិបតីអ៊ុយក្រែន លោក Volodymyr Zelenskyy នេះបើយោងតាមជំនួយការរបស់វិមានក្រឹមឡាំង លោក Yuri Ushakov ដែលបានប្រាប់សារព័ត៌មាន Anadolu៕