យានអវកាស Starship ដ៏ធំរបស់ក្រុមហ៊ុន SpaceX បានផ្ទុះជាបំណែកដុំភ្លើងយ៉ាងខ្លាំងក្លា អំឡុងពេលធ្វើតេស្តសាកល្បងលើកទី១០ នៅរដ្ឋតិចសាស់ សហរដ្ឋអាមេរិក កាលពីយប់ថ្ងៃពុធ (១៨ មិថុនា) ដែលជាបរាជ័យចុងក្រោយបង្អស់ក្នុងការផ្ទុះយ៉ាងតិចពីរលើករួចមកហើយ សម្រាប់កម្មវិធីយានអវកាសភពអង្គារ របស់លោកមហាសេដ្ឋី Elon Musk។

SpaceX បាននិយាយលើវេទិកាសង្គម X ថា ការផ្ទុះនេះបានកើតឡើងនៅវេលាម៉ោង ១១យប់ (ម៉ោងក្នុងស្រុក) នៅពេលយាន Starship ស្ថិតក្នុងការសាកល្បងនៅឯមូលដ្ឋាន Brownsville រដ្ឋតិចសាស់របស់ខ្លួន។ ក្រុមហ៊ុននេះបានសន្មតថាមកពី "ភាពមិនប្រក្រតីដ៏ធំ" ហើយនិយាយថា បុគ្គលិកទាំងអស់មានសុវត្ថិភាព។ ក្រុមវិស្វករ SpaceX កំពុងស៊ើបឧប្បត្តិហេតុនេះ ហើយកំពុងសម្របសម្រួលជាមួយភ្នាក់ងារមូលដ្ឋាន រដ្ឋ និងសហព័ន្ធ ទាក់ទងនឹងផលប៉ះពាល់លើបរិស្ថាន និងសុវត្ថិភាព។

លោក Musk បាននិយាយលើបណ្ដាញសង្គម X ថា "ទិន្នន័យបឋមបង្ហាញថា ឧស្ម័នអាសូត COPV នៅក្នុងច្រកផ្ទុកបន្ទុក បានបរាជ័យក្រោមសម្ពាធទប់ទល់" ពោលគឺសម្ពាធអតិបរិមា ដែលឧបករណ៍ ឬប្រព័ន្ធអាចទប់ទល់បានដោយមិនជួបប្រទះការខូចខាត ឬការថយចុះជាអចិន្ត្រៃយ៍នៅក្នុងដំណើរការ។ លោកបន្តថា "ប្រសិនបើការស៊ើបអង្កេតបន្ថែមទៀតបញ្ជាក់ថាពិតជាមូលហេតុនេះមែន នោះនឹងជាលើកទីមួយហើយសម្រាប់យានប្រភេទនេះ។

គួររម្លឹកថា យាន Starship ហាក់ដូចជាបានជួបប្រទះការផ្ទុះយ៉ាងតិចពីរលើកជាប់ៗគ្នារួចមកហើយ ដោយឆេះបំភ្លឺផ្ទៃមេឃនៅពេលយប់ និងទម្លាក់កម្ទេចកម្ទីចុះមកផ្ទៃផែនដី នេះបើយោងតាមវីដេអូដែលថតបាននៅពេលហេតុការណ៍ផ្ទុះកើតឡើង។ ប្រព័ន្ធ Starship កម្ពស់ ១២២ម៉ែត្រនេះគឺជាគោលដៅសំខាន់របស់លោក Musk ក្នុងការបញ្ជូនមនុស្សទៅកាន់ភពព្រះអង្គារ ប៉ុន្តែត្រូវហ៊ុមព័ទ្ធដោយបរាជ័យជាច្រើននៅឆ្នាំនេះ៕