អ្នកនាំពាក្យអង្គភាពឆ្មាំល្បាតឆ្នេររបស់ចិន (CCG) កាលពីថ្ងៃព្រហស្បតិ៍ សប្ដាហ៍នេះ បានព្រមានហ្វីលីពីនថា រាល់ការប៉ុនប៉ងណាមួយដើម្បីរំលោភលើអធិបតេយ្យភាពទឹកដីរបស់ប្រទេសចិន គឺគ្មានប្រយោជន៍។

អ្នកនាំពាក្យអង្គភាពនេះ លោក Liu Dejun បាននិយាយថាអង្គភាពឆ្មាំល្បាតឆ្នេររបស់ចិន បានចាត់វិធានការប្រឆាំងនឹងសកម្មភាពខុសច្បាប់នាពេលថ្មីៗនេះរបស់នាវាហ្វីលីពីននៅក្នុងសមុទ្រចិនខាងត្បូង ស្របតាមច្បាប់ និងក្រមប្រតិបត្តិ។

យោងតាមលោក Liu បានឱ្យដឹងថា ចាប់ពីថ្ងៃអាទិត្យដល់ថ្ងៃពុធសប្ដា៍នេះ ប្រទេសហ្វីលីពីនបានបញ្ជូននាវាជាច្រើនគ្រឿង ដើម្បីអនុវត្តប្រតិបត្តិការខុសច្បាប់នៅជិតតំបន់ដែនទឹក ប៉ានយា ចាវ (Banyue Jiao) និង ជៀន ចាង ចាវ (Jianzhang Jiao) នៃកោះ Nansha ក្នុងសមុទ្រចិនខាងត្បូង។ 

លោកបាននិយាយថា "នាវាហ្វីលីពីនបានធ្វើសកម្មភាពម្តងហើយម្តងទៀតក្នុងការរំលោភបំពានខុសច្បាប់ និងការបង្កហេតុក្រោមលេសនៃ "ការការពារនេសាទ" ដែលបំផ្លាញសន្តិភាព និងស្ថិរភាពនៅក្នុងសមុទ្រចិនខាងត្បូង។

លោកបានសង្កត់ធ្ងន់ថា ប្រទេសចិនមានអធិបតេយ្យភាពដែលមិនអាចប្រកែកបាននៅលើកោះ Nansha រួមទាំងតំបន់ទាំងពីរខាងលើ ក៏ដូចជាដែនទឹកដែលនៅជាប់គ្នា។ 

លោក Liu បាននិយាយថាអង្គភាពឆ្មាំល្បាតឆ្នេររបស់ចិន នឹងបន្តប្រតិបត្តិការអនុវត្តច្បាប់ជាប្រចាំនៅក្នុងដែនទឹកដែលស្ថិតនៅក្រោមយុត្តាធិការរបស់ប្រទេសចិន ដើម្បីការពារអធិបតេយ្យភាពជាតិ និងសិទ្ធិដែនសមុទ្ររបស់ប្រទេស៕