មន្ត្រីជាន់ខ្ពស់នៃមូលនិធិកុមាររបស់អង្គការសហប្រជាជាតិ(UNICEF) និយាយថា កុមារ៥០.០០០នាក់នៅតំបន់ហ្កាហ្សាស្ទ្រីបបានស្លាប់ ឬរងរបួស ចាប់តាំងពីការប្រយុទ្ធគ្នារវាងអ៊ីស្រាអែល និងក្រុមហាម៉ាសបានផ្ទុះឡើងក្នុងខែតុលា ឆ្នាំ២០២៣។ នាយករងប្រតិបត្តិរបស់អង្គការយូនីសេហ្វ លោកស្រី Kitty van der Heijden បានធ្វើអត្ថាធិប្បាយដូច្នេះ នៅក្នុងបទសម្ភាសន៍ក្នុងទីក្រុងតូក្យូ ប្រទេសជប៉ុន កាលពីថ្ងៃព្រហស្បតិ៍។

លោកស្រី បាននិយាយថា មានការកើនឡើងនៃកង្វះអាហារូបត្ថម្ភនៅក្នុងតំបន់ហ្កាហ្សា ហើយប្រព័ន្ធថែទាំសុខភាពជិតដួលរលំ។ លោកស្រី Van der Heijden និយាយថា បុគ្គលិកនៃកម្មវិធីផ្តល់ជំនួយដឹកនាំដោយអង្គការសហប្រជាជាតិ «ពុំអាចទៅដល់កុមារដែលត្រូវការយើងនោះទេ» ចាប់តាំងពីអ៊ីស្រាអែល បានដាក់ការបិទផ្លូវទាំងស្រុងនៅក្នុងខែមីនា។



លោកស្រី បានអំពាវនាវដល់គ្រប់ភាគីជម្លោះឱ្យបញ្ឈប់អំពើហិង្សា និងអនុញ្ញាតឱ្យបុគ្គលិកអង្គការសហប្រជាជាតិ បន្តការផ្តល់ជំនួយនៅតំបន់ហ្កាហ្សា ដើម្បីឱ្យកុមារអាចរកឃើញក្តីសង្ឃឹមខ្លះ។ លោកស្រី Van der Heijden បានពណ៌នាអំពីស្ថានភាពពិភពលោកបច្ចុប្បន្នថាជា «ពេលវេលាអាក្រក់បំផុតសម្រាប់វ័យកុមារភាព»។ លោកស្រីនិយាយថា កុមារម្នាក់ក្នុងចំណោមកុមារ៦នាក់ក្នុងពិភពលោក កំពុងរស់នៅក្នុងជម្លោះ ឬកំពុងរត់គេចចេញពីជម្លោះ ដែលមិនធ្លាប់មានពីមុនមកក្នុងប្រវត្តិសាស្ត្ររបស់អង្គការយូនីសេហ្វ។

ទាក់ទងនឹងជម្លោះរវាងអ៊ីស្រាអែល និងអ៊ីរ៉ង់ លោកស្រី van der Heijden បាននិយាយថា កុមារនៅភាគីទាំងសងខាងបានស្លាប់ និងរងរបួស។