ប្រមុខបរមាណូរបស់ប្រទេសអ៊ីរ៉ង់ កាលពីថ្ងៃព្រហស្បតិ៍ បានអំពាវនាវឲ្យក្រុមឃ្លាំមើលនុយក្លេអ៊ែររបស់អង្គការសហប្រជាជាតិ បញ្ឈប់ជាបន្ទាន់នូវ «ភាពអសកម្ម»របស់ខ្លួន ហើយថ្កោលទោសការវាយប្រហាររបស់    អ៊ីស្រាអែលទៅលើទីតាំងនុយក្លេអ៊ែរ «សន្តិភាព» របស់អ៊ីរ៉ង់។ នេះបើយោងតាមទីភ្នាក់ងារសារព័ត៌មាន Fars ពាក់កណ្តាលផ្លូវការ។

ប្រធានអង្គការថាមពលបរមាណូរបស់ប្រទេសអ៊ីរ៉ង់ លោក Mohammad Eslami បានធ្វើការអត្ថាធិប្បាយ នៅក្នុងលិខិតមួយផ្ញើទៅកាន់ប្រមុខទីភ្នាក់ងារថាមពលបរមាណួអន្តរជាតិ (IAEA) លោក Rafael Grossi បន្ទាប់ពីការវាយប្រហាររបស់អ៊ីស្រាអែល ទៅលើទីតាំងម៉ាស៊ីនរ៉េអាក់ទ័រទឹកធុនធ្ងន់ Arak ក្នុងតំបន់ Khondab ក្នុងខេត្ត Markazi កាលពីព្រឹកថ្ងៃព្រហស្បតិ៍។

លោក Eslami បានអំពាវនាវឲ្យ IAEA បញ្ចប់ «ភាពអសកម្ម» របស់ខ្លួនជាបន្ទាន់ ហើយថ្កោលទោសសកម្មភាពរបស់អ៊ីស្រាអែល ដែលផ្ទុយនឹងច្បាប់អន្តរជាតិ។



ជម្លោះរវាងអ៊ីស្រាអែល និងអ៊ីរ៉ង់ បានឈានចូលដល់ថ្ងៃទី ៧ហើយ កាលពីថ្ងៃព្រហស្បតិ៍។ ជម្លោះនេះ បានចាប់ផ្តើម បន្ទាប់ពីអ៊ីស្រាអែលកាលពីថ្ងៃទី ១៣ ខែមិថុនា បានបើកការវាយប្រហារតាមអាកាសលើប្រទេសអ៊ីរ៉ង់ ដោយវាយលុកលើទីតាំងយោធានិងនុយក្លេអ៊ែររបស់ប្រទេសនេះ ហើយបានសម្លាប់មេបញ្ជាការយោធាកំពូលៗ និងអ្នកវិទ្យាសាស្ត្រនុយក្លេអ៊ែរ។

អ៊ីរ៉ង់បានឆ្លើយតបដោយការបាញ់មីស៊ីល និងការវាយប្រហារដោយយានដ្រូនប្រឆាំងនឹងគោលដៅក្នុងប្រទេសអ៊ីស្រាអែល។

កាលពីព្រឹកថ្ងៃព្រហស្បតិ៍ អ៊ីរ៉ងបានវាយប្រហារដោយមីស៊ីលទៅលើអគារមួយ នៅមជ្ឈមណ្ឌលវេជ្ជសាស្ត្រ Soroka នៅភាគខាងត្បូងប្រទេសអ៊ីស្រាអែល ដោយបានបង្កមនុស្សយ៉ាងហោចណាស់ ៧១ នាក់ រងរបួស។ នេះបើយោងតាមក្រសួងសុខាភិបាលរបស់អ៊ីស្រាអែល។