រដ្ឋមន្រ្តីការបរទេសអាមេរិក លោក Marco Rubio បានជួបជាមួយប្រមុខការបរទេសអង់គ្លេស លោក David Lammy កាលពីថ្ងៃព្រហស្បតិ៍ (១៩ មិថុនា) និងបានធ្វើកិច្ចសន្ទនាតាមទូរសព្ទដាច់ដោយឡែកជាមួយដៃគូសំខាន់ៗផ្សេងទៀតដូចជា អូស្រ្តាលី បារាំង និងអ៊ីតាលី ដើម្បីពិភាក្សាអំពីសង្រ្គាមរវាងសម្ព័ន្ធមិត្តអាមេរិក គឺអ៊ីស្រាអែល និងគូប្រជែងអ៊ីរ៉ង់។

ក្រសួងការបរទេសអាមេរិក បាននិយាយថា លោក Rubio និងបណ្ដារដ្ឋមន្ត្រីការបរទេសផ្សេងទៀត បានយល់ស្របជារួមថា "អ៊ីរ៉ង់ មិនអាចអភិវឌ្ឍ ឬទទួលបានអាវុធនុយក្លេអ៊ែរបានជាដាច់ខាត"។ លោក Lammy បាននិយាយដូចគ្នានេះនៅលើបណ្ដាញសង្គម X ខណៈបន្ថែមថា ស្ថានភាពនៅមជ្ឈិមបូព៌ា "នៅតែគ្រោះថ្នាក់" ហើយ "ឥឡូវនេះមានឱកាស ២សប្តាហ៍ ដើម្បីសម្រេចដំណោះស្រាយការទូត"។

សង្រ្គាមផ្លូវអាកាសរវាងអ៊ីរ៉ង់ និងអ៊ីស្រាអែល ដែលបានចាប់ផ្តើមនៅថ្ងៃទី១៣ ខែមិថុនា នៅពេលអ៊ីស្រាអែលវាយប្រហារអ៊ីរ៉ង់ បានបង្កើនការប្រកាសអាសន្ននៅក្នុងតំបន់មជ្ឈិមបូព៌ា ដែលស្ថិតនៅលើមាត់ជ្រោះរួចទៅហើយ ចាប់តាំងពីការចាប់ផ្តើមនៃការវាយលុកយោធារបស់អ៊ីស្រាអែល លើតំបន់ហ្កាហ្សា ក្នុងខែតុលា ឆ្នាំ២០២៣ មក។

សេវិមានបាននិយាយនៅថ្ងៃព្រហស្បតិ៍ថា លោកប្រធានាធិបតី Donald Trump នឹងសម្រេចចិត្តក្នុងពេលពីរសប្តាហ៍ខាងមុខ ថាតើសហរដ្ឋអាមេរិក នឹងចូលរួមក្នុងសង្គ្រាមដែរឬទេ។ អ៊ីស្រាអែល ដែលជាប្រទេសតែមួយគត់នៅមជ្ឈិមបូព៌ាដែលជឿថាមានអាវុធនុយក្លេអ៊ែរ បាននិយាយថា ខ្លួនវាយប្រហារអ៊ីរ៉ង់ ដើម្បីរារាំងប្រទេសនេះមិនឱ្យអភិវឌ្ឍអាវុធនុយក្លេអ៊ែរ។ អ៊ីរ៉ង់ ដែលនិយាយថាកម្មវិធីនុយក្លេអ៊ែររបស់ខ្លួនមានសន្តិភាព ក៏បានសងសឹកលើអ៊ីស្រាអែលវិញយ៉ាងចាស់ដៃ ខណៈការភ័យខ្លាចនៃសង្រ្គាមពេញបន្ទុកមិនអន់ថយ៕