អង្គការសហប្រជាជាតិ (UN) បានប្រារព្ធទិវាអន្តរជាតិសម្រាប់ការលុបបំបាត់អំពើហិង្សាផ្លូវភេទ ក្នុងជម្លោះ នៅប្រទេសសូម៉ាលីកាលពីថ្ងៃព្រហស្បតិ៍ ជាមួយនឹងការអំពាវនាវឲ្យមានការគាំទ្រកាន់តែច្រើនសម្រាប់អ្នករស់រានមានជីវិតនិងជនរងគ្រោះនៃអំពើហិង្សាផ្លូវភេទ។

អ្នកតំណាងពិសេសរបស់អគ្គលេខាធិការអង្គការសហប្រជាជាតិប្រចាំប្រទេសសូម៉ាលី លោក James Swan បាននិយាយនៅក្នុងសេចក្តីថ្លែងការណ៍មួយ ដែលបានចេញនៅទីក្រុងម៉ូហ្គាឌីស្យូ( Mogadishu) រដ្ឋធានីនៃប្រទេសសូម៉ាលីថា៖«សហគមន៍សូម៉ាលី សមនឹងទទួលបានការសរសើរចំពោះការគាំទ្រអ្នករស់រានមានជីវិត និងជនរងគ្រោះពីឧក្រិដ្ឋកម្មដ៏សាហាវព្រៃផ្សៃទាំងនេះ»។

លោកបានបន្ថែមថា៖«សម្រាប់ប្រទេសសូម៉ាលីកសាងសង្គមមួយដែលគ្មានការមើលងាយ និងការប៉ះទង្គិចនៃអំពើហិង្សាផ្លូវភេទ យើងទាំងអស់គ្នា ត្រូវតែធ្វើការដើម្បីការពារ និងឆ្លើយតបទៅនឹងអំពើហិង្សាផ្លូវភេទ» ដោយបានអំពាវនាវឲ្យអាជ្ញាធរសូម៉ាលីបន្ត និងពង្រឹងកិច្ចខិតខំប្រឹងប្រែង ក្នុងការប្រយុទ្ធប្រឆាំងនឹងការធ្វើឲ្យអាម៉ាស់មុខ និងផ្តល់ការគាំទ្រដ៏មានអត្ថន័យដល់អ្នករស់រានមានជីវិត គ្រួសារ និងសហគមន៍។

ស្របតាមប្រធានបទឆ្នាំនេះគឺ«ឥទ្ធិពលអន្តរជំនាន់នៃអំពើហិង្សាផ្លូវភេទដែលទាក់ទងនឹងជម្លោះ» អង្គការសហប្រជាជាតិនៅក្នុងប្រទេសសូម៉ាលី បាននិយាយថា ខ្លួនកំពុងធ្វើការជាមួយភាគីពាក់ព័ន្ធ ដើម្បីគូសបញ្ជាក់ពីរបៀបដែលអំពើហិង្សាផ្លូវភេទបង្កឲ្យមានគ្រោះថ្នាក់រយៈពេលវែង មិនត្រឹមតែលើបុគ្គលប៉ុណ្ណោះទេ ថែមទាំងលើការទំនាក់ទំនងសង្គមដ៏ទូលំទូលាយផងដែរ ដែលជារឿយៗធ្វើឲ្យគ្រួសារ និងសហគមន៍ប្រឈមនឹងផលប៉ះពាល់យ៉ាងធ្ងន់ធ្ងរជាច្រើនជំនាន់។