សារព័ត៌មាន NBC News បានរាយការណ៍ដោយដកស្រង់សម្តីអតីតមន្ត្រីចារកម្មជាន់ខ្ពស់អ៊ីស្រាអែល ដែលបន្តទទួលព័ត៌មានបច្ចុប្បន្នភាពប្រចាំថ្ងៃពីរដ្ឋាភិបាលអ៊ីស្រាអែលថា ប្រព័ន្ធការពារមីស៊ីល Iron Dome របស់អ៊ីស្រាអែល អាចស្ទាក់ចាប់បាន ៦៥% នៃមីស៊ីលរបស់អ៊ីរ៉ង់ ដែលបានបាញ់ ក្នុងរយៈពេល ២៤ ម៉ោងកន្លងទៅនេះ។ 

យោងតាមមន្ត្រីរូបនេះ បានឲ្យដឹងថា មីស៊ីលរបស់អ៊ីរ៉ង់ ត្រូវបានបំពាក់ដោយប្រព័ន្ធរុករកសម្រាប់ដំណាក់កាលចុងក្រោយនៃការហោះហើររបស់ពួកគេ ដែលជួយឲ្យពួកវាបាញ់ចំគោលដៅដែលបានកំណត់ យ៉ាងជាក់លាក់។

លោកបានប្រាប់សារព័ត៌មាន NBC Newsថា ទោះបីជាមានការបានបាត់បង់អ្នកដឹកនាំសំខាន់ៗមួយចំនួន បន្ទាប់ពីការវាយប្រហាររបស់អ៊ីស្រាអែលដ៏គួរឲ្យភ្ញាក់ផ្អើលកាលពីសប្តាហ៍មុនក៏ដោយ ក៏អ៊ីរ៉ង់នៅតែមានឃ្លាំងផ្ទុកមីស៊ីលធំៗមួយចំនួនទៀតដែរ ។ លោកបានពិពណ៌នាវិធីសាស្រ្តរបស់អ៊ីរ៉ង់ថា ជា «ការអត់ធ្មត់ជាយុទ្ធសាស្ត្រ»។

កាលពីយប់ថ្ងៃទី ១៣ ខែមិថុនា អ៊ីស្រាអែល បានចាប់ផ្តើមប្រតិបត្តិការតោងើបរបស់ខ្លួន ដោយកំណត់គោលដៅលើកម្មវិធីនុយក្លេអ៊ែររបស់អ៊ីរ៉ង់។ អ៊ីរ៉ង់បានឆ្លើយតបក្នុងរយៈពេលតិចជាង ២៤ម៉ោង។ ទីក្រុងតែលអាវីវ និងទីក្រុងតេអេរ៉ង់ បានវាយប្រហារគ្នាម្តងទៀត នៅប៉ុន្មានថ្ងៃក្រោយមក។ ភាគីទាំងពីរ បានរាយការណ៍ពីចំនយនអ្នកស្លាប់និងរបួស និងការខូចខាតដែលបណ្តាលមកពីការវាយប្រហារទាំងនេះ ហើយបានទទួលស្គាល់ថា គោលដៅជាច្រើននៅលើទឹករបស់ពួកគេ បានរងការវាយប្រហារ ទោះបីជាយ៉ាងក៏ដោយ ពួកគេបានអះអាងថា ការខូចខាតនោះ មានកម្រិត ហើយការវាយប្រហារទៅវិញទៅមក នៅកំពុងបន្ត។