អគ្គលេខាធិការរបស់ក្រុមហេសបូឡា លោក Naim Qassem បាននិយាយថា នៅក្នុងជម្លោះដ៏មានសក្តានុពលជាមួយអ៊ីស្រាអែល និងសហរដ្ឋអាមេរិក ចលនាហេសបូឡា Shia នៅប្រទេសលីបង់ នឹងធ្វើ«អ្វីដែលខ្លួនយល់ឃើញថា ត្រឹមត្រូវ។

«យើងមិនមែនជាភាគីអព្យាក្រឹត ក្នុងជម្លោះរវាងអ៊ីរ៉ង់ និងអ៊ីស្រាអែលជាមួយសហរដ្ឋអាមេរិកនោះទេ។ យើងនៅខាងអ៊ីរ៉ង់យ៉ាងពេញលេញ ហើយនៅក្នុងការប្រឈមនឹងការឈ្លានពានរបស់អ៊ីស្រាអែលនិងសហរដ្ឋអាមេរិក យើងនឹងធ្វើអ្វីដែលយើងមើលឃើញថា ស័ក្តិសម»។

លោក Qassem មិនបានបញ្ជាក់លម្អិតថាតើចលនានេះ មានផែនការចូលរួមពេញបន្ទុកក្នុងជម្លោះប្រដាប់អាវុធដែលកំពុងបន្តនេះ ដែរឬអត់នោះទេ។

ទូរទស្សន៍ Al Hadath បានរាយការណ៍កាលពីថ្ងៃទី ១៨ ខែមិថុនាថា ក្រុមហេសបូឡា អាចនឹងចូលរួមជាមួយអ៊ីរ៉ង់ក្នុងជម្លោះជាមួយអ៊ីស្រាអែល ប្រសិនបើចាំបាច់។ ប្រភពដែលស្និទ្ធនឹងហេសបូឡាបានប្រាប់ប៉ុស្តិ៍ទូរទស្សន៍នេះថា ប្រសិនបើចលនានេះ សម្រេចចិត្តធ្វើអន្តរាគមន៍ ក្នុងជម្លោះប្រដាប់អាវុធនោះ វានឹងប្រើ «អាវុធធុនធ្ងន់» ប្រឆាំងនឹងរដ្ឋជ្វីហ្វ។ ទោះបីជាយ៉ាងណាក៏ដោយ ប្រភពបានសង្កត់ធ្ងន់ថា ក្រុមហេសបូឡា នឹងចូលរួមក្នុងជម្លោះ «ប្រសិនបើរដ្ឋាភិបាលអ៊ីរ៉ង់ មានអារម្មណ៍ថា ខ្លួនកំពុងបាត់បង់ការគ្រប់គ្រងលើស្ថានការណ៍នេះ»។

កាលពីយប់ថ្ងៃទី ១៣ ខែមិថុនា អ៊ីស្រាអែល បានចាប់ផ្តើមប្រតិបត្តិការតោងើបរបស់ខ្លួន ដោយកំណត់គោលដៅលើកម្មវិធីនុយក្លេអ៊ែររបស់អ៊ីរ៉ង់។ អ៊ីរ៉ង់បានឆ្លើយតបក្នុងរយៈពេលតិចជាង ២៤ម៉ោង។ ទីក្រុងតែលអាវីវ និងទីក្រុងតេអេរ៉ង់ បានវាយប្រហារគ្នាម្តងទៀត នៅប៉ុន្មានថ្ងៃក្រោយមក។ ភាគីទាំងពីរ បានរាយការណ៍ពីចំនយនអ្នកស្លាប់និងរបួស និងការខូចខាត ហើយបានទទួលស្គាល់ថា គោលដៅជាច្រើន បានរងការវាយប្រហារ ប៉ុន្តែពួកគេ បានអះអាងថា ការខូចខាតនោះ មានកម្រិត។ 

នៅថ្ងៃទី ១៣ ខែមិថុនា ក្រុមហេសបូឡា បានថ្កោលទោសយ៉ាងដាច់អហង្ការចំពោះការវាយប្រហាររបស់អ៊ីស្រាអែល ហើយបានបង្ហាញ«សាមគ្គីភាពពេញលេញជាមួយរដ្ឋាភិបាល និងប្រជាជនអ៊ីរ៉ង់»។ ទោះបី     ជា ខ្លួនមិនបានប្រកាសថា ខ្លួនចូលរួមជម្លោះនៅខាងអ៊ីរ៉ង់ក៏ដោយ។