ប្រភពការទូត កាលពីថ្ងៃព្រហស្បតិ៍ (ទី១៩ ខែមិថុនា) នេះ បានឲ្យដឹងថា នាវាពិឃាតរបស់កងកម្លាំងស្វ័យការពារដែនសមុទ្រ (MSDF) របស់ប្រទេសជប៉ុន បានធ្វើដំណើរឆ្លងកាត់ច្រកសមុទ្រតៃវ៉ាន់ កាលពីសប្តាហ៍មុន ពោលគឺប៉ុន្មានថ្ងៃបន្ទាប់ពីយន្តហោះចម្បាំងរបស់ចិន បានហោះហើរយ៉ាងគ្រោះថ្នាក់ក្បែរយន្តហោះល្បាតរបស់ជប៉ុន នៅលើមហាសមុទ្រប៉ាស៊ីហ្វិក។

នេះគឺជាលើកទី៣ ដែលនាវា MSDF ត្រូវបានរាយការណ៍ឆ្លងកាត់ផ្លូវទឹកនេះ ដោយគ្រប់ហេតុការណ៍កើតឡើង នៅក្នុងឆ្នាំមុន មានគោលបំណងជាក់ស្ដែងផ្ដល់សញ្ញាដាស់តឿនដល់ប្រទេសចិន ដែលបន្តដាក់សម្ពាធលើកោះតៃវ៉ាន់ ជាកោះស្វ័យគ្រប់គ្រងកាន់លទ្ធិប្រជាធិបតេយ្យ ដែលអះអាងថា ខ្លួនជាដែនដីអធិបតេយ្យភាព។

ប្រភពបានឲ្យដឹងថា នាវា Takanami បានចូលច្រកសមុទ្រនេះពីសមុទ្រចិនខាងកើត កាលពីថ្ងៃទី១២ ខែមិថុនា ហើយបានចំណាយពេលជាង ១០ម៉ោង នៅពេលដែលនាវានោះតម្រង់ឆ្ពោះទៅភាគខាងត្បូង។ បន្ទាប់ពីឆ្លងកាត់ចក្រសមុទ្រនេះ នាវាពិឃាតនោះបានធ្វើដំណើរទៅកាន់ដែនទឹកនៃកោះ Luzon របស់ប្រទេសហ្វីលីពីន។

យោងតាមប្រភពដដែល បានឲ្យដឹងបន្ថែមថា ការឆ្លងកាត់ទាំងមូលត្រូវបានតាមដាន និងត្រួតពិនិត្យដោយយោធារបស់ចិន។ នាវា Takanami បានធ្វើសមយុទ្ធដែនសមុទ្ររួមគ្នាជាមួយកងទ័ពជើងទឹកហ្វីលីពីនកាលពីថ្ងៃទី១៤ ខែមិថុនា នៅតំបន់នៃសមុទ្រចិនខាងត្បូង ដែលប្រទេសអាស៊ីអាគ្នេយ៍ទាមទារថា ជាកម្មសិទ្ធិរបស់ខ្លួន ក្នុងពេលដែលចិនអះអាងសិទ្ធិកាន់តែខ្លាំងឡើងៗ នៅក្នុងដែនទឹកនេះ៕