ការិយាល័យរបស់លោក David Lammy កាលពីថ្ងៃព្រហស្បតិ៍ (ទី១៩ ខែមិថុនា) បានឲ្យដឹងថា រដ្ឋមន្ត្រីការបរទេសអង់គ្លេសរូបនេះ នឹងធ្វើដំណើរទៅកាន់ទីក្រុងហ្សឺណែវ ប្រទេសស្វីស នៅថ្ងៃសុក្រ (ទី២០ ខែមិថុនា) នេះ ដើម្បីចូលរួមកិច្ចចរចានុយក្លេអ៊ែរជាមួយអ៊ីរ៉ង់ និងសមភាគីអឺរ៉ុប ដែលជាកិច្ចប្រឹងប្រែងយ៉ាងសស្រាក់សស្រាំ ដើម្បីជំរុញដល់ដំណោះស្រាយការទូត ជុំវិញកម្មវិធីនុយក្លេអ៊ែររបស់ទីក្រុងតេអេរ៉ង់។

គួរបញ្ជាក់ថា អ៊ីស្រាអែល និងអ៊ីរ៉ង់ បានជាប់នៅក្នុងសង្គ្រាមផ្លូវអាកាស តាំងពីសប្តាហ៍មុន បន្ទាប់ពីអ៊ីស្រាអែលបានបើកការវាយប្រហារយោធាលើអ៊ីរ៉ង់ដែលបានបាញ់ស្រោចមីស៊ីលសងសឹកវិញ។

ការធ្វើដំណើររបស់លោក Lammy ទៅប្រទេសស្វីស បន្ទាប់ពីមានដំណើរទស្សនកិច្ចរបស់លោកទៅកាន់ក្រុងវ៉ាស៊ីនតោន ជាទីដែលលោកបានជួបជាមួយរដ្ឋមន្ត្រីការបរទេសអាមេរិក លោក Marco Rubio និងបេសកជនពិសេសរបស់សេតវិមានប្រចាំតំបន់មជ្ឈិមបូព៌ា លោក Steve Witkoff។

លោក Lammy បានលើកឡើងនៅក្នុងសេចក្តីថ្លែងការណ៍មួយថា៖ «យើងប្តេជ្ញាថា អ៊ីរ៉ង់មិនត្រូវមានអាវុធនុយក្លេអ៊ែរជាដាច់ខាត។ ឥឡូវនេះ ឱកាសមានក្នុងរង្វង់រយៈពេល ២សប្តាហ៍ ដើម្បីសម្រេចបាននូវដំណោះស្រាយការទូត។ ឥឡូវនេះ ជាពេលវេលា ដើម្បីបញ្ឈប់ទិដ្ឋភាពហិង្សាដ៏អាក្រក់ នៅតំបន់មជ្ឈិមបូព៌ា និងទប់ស្កាត់ការកើនឡើងនូវភាពតានតឹងក្នុងតំបន់ ជាអ្វីដែលមិនផ្តល់ផលប្រយោជន៍ដល់នរណាម្នាក់ឡើយ»។

បើតាមប្រភពពីអាល្លឺម៉ង់បានប្រាប់សារព័ត៌មាន Reuters ថា រដ្ឋមន្ត្រីការបរទេសរបស់ប្រទេសអង់គ្លេស បារាំង និងអាល្លឺម៉ង់ ដែលត្រូវបានគេស្គាល់ថា E3 នឹងជួបជាមួយអ្នកការទូតជាន់ខ្ពស់របស់សហភាពអឺរ៉ុប លោកស្រី Kaja Kallas នៅបេសកកម្មអចិន្ត្រៃយ៍របស់អាល្លឺម៉ង់ នៅទីក្រុងហ្សឺណែវ មុនពេលជួបប្រជុំរួមគ្នា ជាមួយរដ្ឋមន្ត្រីការបរទេសអ៊ីរ៉ង់៕