នៅថ្ងៃព្រហស្បតិ៍ (ទី១៩ ខែមិថុនា) តុលាការឧទ្ធរណ៍របស់សហរដ្ឋអាមេរិក បានអនុញ្ញាតឲ្យលោក Donald Trump អាចបន្តគ្រប់គ្រងលើឆ្មាំជាតិរបស់រដ្ឋ California ខណៈដែលអភិបាលពីគណបក្សប្រជាធិបតេយ្យរបស់រដ្ឋនេះ បន្តប្ដឹងតវ៉ា ចំពោះភាពស្របច្បាប់នៃការប្រើប្រាស់កងទ័ពរបស់លោកប្រធានាធិបតីខាងបក្សសាធារណរដ្ឋ ដើម្បីបង្ក្រាបការតវ៉ា និងភាពចលាចល នៅទីក្រុង Los Angeles។

ក្រុមប្រឹក្សាចៅក្រម ៣រូបនៃសាលាឧទ្ធរណ៍ទី៩ ដែលមានមូលដ្ឋាននៅទីក្រុងសាន់ហ្វ្រាន់ស៊ីស្កូ បានសម្រេចពន្យារការផ្អាក ដែលជាសេចក្តីសម្រេចកាលពីទី១២ ខែមិថុនា របស់ចៅក្រមសហព័ន្ធប្រចាំតំបន់របស់អាមេរិក គឺលោក Charles Breyer ដែលបានសម្រេចថា លោក Trump បានគ្រប់គ្រងឆ្មាំជាតិរបស់រដ្ឋ California ដោយខុសច្បាប់។ សេចក្តីសម្រេចរបស់លោក Breyer ត្រូវបានចេញ សម្រាប់បណ្តឹងប្រឆាំងនឹងវិធានការរបស់លោក Trump ដែលត្រូវបានដាក់ដោយអភិបាលរដ្ឋ លោក Gavin Newsom។

គួរបញ្ជាក់ថា អំឡុងពេលមានការតវ៉ា និងភាពចលាចល នៅទីក្រុង Los Angeles ពាក់ព័ន្ធនឹងការវាយឆ្មក់អន្តោប្រវេសន៍របស់លោក Trump លោកប្រធានាធិបតីរូបនេះ កាលពីថ្ងៃទី៧ ខែមិថុនា បានគ្រប់គ្រងឆ្មាំជាតិរបស់រដ្ឋ California ហើយបានដាក់ពង្រាយទាហាន ៤.០០០នាក់ ដែលផ្ទុយនឹងការចង់បានរបស់លោក Newsom។ លោក Trump ក៏បានបញ្ជាឲ្យទាហានម៉ារីនអាមេរិកចំនួន ៧០០នាក់ទៅកាន់ទីក្រុងនេះផងដែរ បន្ទាប់ពីបានបញ្ជូនកងឆ្មាំជាតិទៅ។ លោក Breyer មិនទាន់សម្រេចលើភាពស្របច្បាប់នៃការចល័តកងម៉ារីននៅឡើយទេ។

នៅឯសវនាការ កាលពីថ្ងៃអង្គារ ចៅក្រមបានសួរមេធាវីរបស់រដ្ឋ California និងលោក Trump ថា តើតុលាការគួរមានអំណាចពិនិត្យមើលការសម្រេចចិត្តរបស់លោក Trump ក្នុងការដាក់ពង្រាយទាហានដែរ ឬទេ។ ចៅក្រមទាំងនោះ កំពុងព្យាយាមសម្រេចថា តើត្រូវបន្តរារាំងការសម្រេចពីមុនប្រឆាំងនឹងលោក Trump ដែរ ឬយ៉ាងណា៕