នាយករដ្ឋមន្ត្រីន័រវែស នៅថ្ងៃសុក្រ (ទី២០ ខែមិថុនា) នេះ បាននិយាយថា ប្រទេសរបស់លោកគ្រោងនឹងបង្កើនការចំណាយសរុប លើវិស័យការពារជាតិ និងសន្តិសុខដ៏ទូលំទូលាយដល់កម្រិត ៥ភាគរយនៃផលិតផលក្នុងស្រុកសរុប (GDP) ពោលគឺស្របតាមគោលដៅរួមដែលបានគ្រោងទុក ក្នុងចំណោមរដ្ឋសមាជិករបស់អង្គការណាតូ (NATO)។

តំបន់អឺរ៉ុបកំពុងប្រញាប់ប្រញាល់បង្កើនការចំណាយក្នុងវិស័យការពារជាតិ ដើម្បីត្រៀមទប់ទល់នឹងលទ្ធភាពនៃការវាយប្រហាររបស់រុស្ស៊ី បន្ទាប់ពីរដ្ឋបាលរបស់លោកប្រធានាធិបតីអាមេរិក Donald Trump បានបញ្ជាក់យ៉ាងច្បាស់ថា សហរដ្ឋអាមេរិកលែងមានឆន្ទៈ ក្នុងការធ្វើជាអ្នកធានាសន្តិសុខដ៏ធំរបស់អឺរ៉ុបទៀតហើយ។

អគ្គលេខាធិការអង្គការណាតូ លោក Mark Rutte បានស្នើថា ប្រទេសជាសមាជិកគួរតែព្រមព្រៀងក្នុងគោលដៅចំណាយ ៥ភាគរយនៃ GDP របស់ខ្លួន នៅក្នុងវិស័យការពារជាតិ និងវិធានការសន្តិសុខដ៏ទូលំទូលាយ នៅពេលដែលបណ្ដារដ្ឋទាំងនោះជួបប្រជុំគ្នា នៅថ្ងៃទី ២៤-២៥ ខែមិថុនា ក្នុងទីក្រុងឡាអេ ប្រទេសហូឡង់។

នៅថ្ងៃសុក្រនេះ នាយករដ្ឋមន្ត្រីន័រវេស លោក Jonas Gahr Stoere បានប្រាប់សន្និសីទសារព័ត៌មានថា៖ «យើងត្រូវតែធ្វើកិច្ចការបន្ថែមទៀត ដើម្បីការពារប្រទេសរបស់យើង និងរួមចំណែកដល់សន្តិសុខរួមរបស់យើងជាមួយសម្ព័ន្ធមិត្តរបស់យើង នៅក្នុងអង្គការណាតូ»។ លោកបានសង្កត់ធ្ងន់ថា៖ «សន្តិសុខសម្រាប់ប្រទេសន័រវេស គឺពាក់ព័ន្ធនឹងការការពារដែលអាចទុកចិត្តបាន ដែលមានគ្រឿងយុទ្ធោបករណ៍ត្រឹមត្រូវ មនុស្សគ្រប់គ្រាន់ និងផែនការល្អ»។

ទីភ្នាក់ងារស្ថិតិជាតិ (SSB) បានឲ្យដឹងកាលពីខែមេសាថា ប្រទេសន័រវេស ក្នុងឆ្នាំ២០២៤ បានចំណាយប្រមាណ ២,២ភាគរយនៃ GDP សម្រាប់វិស័យការពារជាតិ ដោយកើនឡើងពីកម្រិតទាប ១,៤ភាគរយ ក្នុងឆ្នាំ២០២២ ហើយរដ្ឋាភិបាលបានលើកឡើងកាលពីខែឧសភាថា ខ្លួនមានគោលបំណងបង្កើនការចំណាយកម្រិត ៣,៣ភាគរយ ក្នុងឆ្នាំ២០២៥ នេះ៕