នៅក្នុងបទសម្ភាសន៍ជាមួយទូរទស្សន៍រដ្ឋ នាថ្ងៃសុក្រ (ទី២០ ខែមិថុនា) នេះ រដ្ឋមន្ត្រីការបរទេសអ៊ីរ៉ង់ លោក Abbas Araghchi បានច្រានចោលពីការមានការចរចាណាមួយ ជាមួយសហរដ្ឋអាមេរិក ខណៈដែលអ៊ីស្រាអែលបន្តវាយប្រហារលើអ៊ីរ៉ង់។

ប្រមុខការទូតដែលគ្រោងមានកិច្ចពិភាក្សា នៅទីក្រុងហ្សឺណែវ ប្រទេសស្វីស ជាមួយសមភាគីអ៊ឺរ៉ុបនោះ បានលើកឡើងថា៖ «អាមេរិកបានផ្ញើសារម្តងហើយម្តងទៀត ដោយអំពាវនាវឲ្យមានការចរចាយ៉ាងម៉ត់ចត់។ ប៉ុន្តែយើងបានបញ្ជាក់យ៉ាងច្បាស់ថា ដរាបណាការឈ្លានពានមិនទាន់បញ្ឈប់ នោះនឹងមិនមានឱកាស សម្រាប់កិច្ចការការទូត និងការសន្ទនាគ្នាឡើយ»។

អ្នកការទូតជាន់ខ្ពស់អឺរ៉ុប កំពុងជួបជាមួយលោក Arghchi នៅទីក្រុងហ្សឺណែវ នាថ្ងៃសុក្រនេះ ដើម្បីពិភាក្សា អំពីកម្មវិធីនុយក្លេអ៊ែររបស់អ៊ីរ៉ង់។ ទីប្រឹក្សារបស់លោក គឺលោក Mohammad Reza Ranjbaran បានឲ្យដឹងនៅលើបណ្ដាញសង្គម X ថា៖ «ខ្ញុំបានទទួលការហៅទូរសព្ទជាច្រើនដង ដែលធានាអះអាងដល់ខ្ញុំថា របបគាំទ្រល្ធិហ្សាអឺន (អ៊ីស្រាអែល) នឹងមិនកំណត់គោលដៅលើលោក Araghchi ពេលធ្វើដំណើរទៅទីក្រុងហ្សឺណែវឡើយ»។ 

រដ្ឋមន្ត្រីការបរទេសមកពីប្រទេសបារាំង អាល្លឺម៉ង់ អង់គ្លេស និងសហភាពអឺរ៉ុប កំពុងជំរុញឲ្យមានការបន្ធូរបន្ថយភាពតានតឹង ដោយរដ្ឋមន្ត្រីការបរទេសអង់គ្លេស លោក David Lammy បាននិយាយថា ពីរសប្តាហ៍បន្ទាប់ គឺជា «ឱកាសមួយ ដើម្បីសម្រេចបាននូវដំណោះស្រាយការទូត»៕