រដ្ឋាភិបាលបានឲ្យដឹងថា បែលហ្ស៊ិកនឹងដាក់ចេញនូវការត្រួតពិនិត្យតាមព្រំដែន លើអ្នកដែលចូលមកក្នុងប្រទេស ដើម្បីទប់ស្កាត់ដល់ទេសន្តរប្រវេសន៍ខុសច្បាប់ ដោយនេះជាការរឹតបន្តឹងមួយផ្សេងទៀត លើការធ្វើដំណើរដោយសេរី នៅតំបន់ Schengen របស់អឺរ៉ុប។

នៅថ្ងៃសុក្រ (ទី២០ ខែមិថុនា) នេះ អ្នកនាំពាក្យរបស់អនុរដ្ឋមន្ត្រីក្រសួងទេសន្តរប្រវេសន៍ លោកស្រី Anneleen Van Bossuyt បាននិយាយថា ការរឹតបន្តឹងនៅក្នុងប្រទេសដែលមានព្រំប្រទល់ជាប់ហូឡង់ បារាំង លុចសំបួ និងអាល្លឺម៉ង់ នឹងចាប់ផ្តើមនៅរដូវក្តៅនេះ។

លោកស្រី Van Bossuyt បានសរសេរនៅលើបណ្ដាញសង្គម X ថា៖ «នេះជាពេលពេលវេលា ដើម្បីគ្រប់គ្រងការចូលប្រទេស។ បែលហ្ស៊ិកមិនត្រូវក្លាយជាទីកន្លែងទាក់ទាញ សម្រាប់អ្នកដែលមកឈប់សំចត ដើម្បីឆ្លងទៅកន្លែងផ្សេងនោះទេ។ សាររបស់យើងច្បាស់លាស់ណាស់ គឺថា បែលហ្ស៊ិកនឹងមិនយល់យោគដល់ទេសន្តរប្រវេសន៍ និងការសុំសិទ្ធិជ្រកកោនដោយខុសច្បាប់ទៀតទេ»។

ការប្រកាសនេះធ្វើឡើងបន្ទាប់ពីមានចំណាត់ការស្រដៀងគ្នាដោយប្រទេសហូឡង់ និងអាល្លឺម៉ង់ ដែលជាផ្នែកមួយនៃការបង្រ្កាបយ៉ាងទូលំទូលាយលើអន្តោប្រវេសន៍ នៅទូទាំងទ្វីប ទោះបីជាចំនួននៃការមកដល់ តាមរយៈផ្លូវសំខាន់ៗជាច្រើន បានបង្ហាញពីសញ្ញាធ្លាក់ចុះក៏ដោយ។

គួរបញ្ជាក់ថា នាយករដ្ឋមន្ត្រី លោក Bart De Wever ដែលបានចូលកាន់តំណែងតាំងពីខែកុម្ភៈ បាននិយាយថា ការទប់ស្កាត់អន្តោប្រវេសន៍ គឺជាអាទិភាពសំខាន់ចម្បង សម្រាប់រដ្ឋាភិបាលស្តាំនិយមរបស់លោក៕