ភ្នំពេញ ÷ រដូវធ្លាក់ភ្លៀងបានចូលមកដល់ហើយ មន្រី្តជំនាញមនី្ទរសុខាភិបាល នៃរដ្ឋបាលរាជធានីភ្នំពេញ សហការជាមួយអាជ្ញាធរ បានចុះចែកខិតប័ណ្ណ អប់រំសុខភាព ដាក់ថ្នាំអាបែត ក្នុងពាងទឹក និងបាញ់ថ្នាំមូស ដើម្បីទប់ស្កាត់ និងការពារជំងឺគ្រុនឈាម នៅក្នុងភូមិប្រកា សង្កាត់ព្រៃស ខណ្ឌដង្កោ រាជធានីភ្នំពេញ។

លោកវេជ្ជបណ្ឌិត តាំង ប៊ុនឃីម ប្រធានកម្មវិធីជំងឺគ្រុនចាញ់ និងគ្រុនឈាម នៃមនី្ទរសុខាភិបាលរាជធានីភ្នំពេញ បានប្រាប់BTV ព័ត៌មាន កាលពីល្ងាចថ្ងៃទី១៩ ខែមិថុនា ឆ្នាំ២០២៥ថា ដោយសាររដូវធ្លាក់ភ្លៀងបានចូលមកដល់ហើយ សុំឲ្យបងប្អូនប្រជាពលរដ្ឋរស់នៅក្នុងមូលដ្ឋានរាជធានីភ្នំពេញ ក៏ដូចជាតាមបណ្តាខេត្ត ទូទាំងប្រទេស ឲ្យមានការប្រុងប្រយ័ត្នទាំងអស់គ្នា ដើម្បីទប់ស្កាត់ការកើនឡើងជំងឺគ្រុនឈាម ព្រោះភ្លៀងធ្លាក់កាន់តែច្រើនហើយ។ ដូច្នេះការវិវត្តន៍របស់ជំងឺគ្រុនឈាម វាអាចវិវត្តន៍កើនឡើងតាមប្រព័ន្ធទឹកភ្លៀង។ ជាពិសេសមន្រី្តជំនាញរបស់យើង បានតាមដានសភាពការករណីជំងឺគ្រុនឈាម ជាប្រចាំ និងរៀងរាល់សប្តាហ៍យើងតាមដានករណីជំងឺគ្រុនឈាម ថាតើតំបន់ណាមានការកើនឡើងករណីជំងឺគ្រុនឈាម គឺយើងមានកម្មវិធីចុះទៅអប់រំបន្ថែម និងដាក់ថ្នាំអាបែត និងបាញ់ថ្នាំសម្លាប់មូសក្នុងរាជធានីភ្នំពេញ។ ព្រោះជម្ងឺគ្រុនឈាម គឺជាជម្ងឺគួរឱ្យបារម្ភសម្រាប់ក្មេងៗ ជាពិសេសនៅរដូវភ្លៀង ។ ជម្ងឺនេះ បង្កឡើងដោយភ្នាក់ងារចម្លងមូសខ្លា ហើយថ្នាំអាបែត ជាប្រភេទថ្នាំដាក់ចូលក្នុងទឹក សម្រាប់កំចាត់ពងមូស មុនពេលវាញាស់។

ទន្ទឹមគ្នានោះដែរ លោក ផែន សុថា សមាជិកក្រុមប្រឹក្សាសង្កាត់ព្រៃស និងប្រជាពលរដ្ឋ បានថ្លែងអំណរគុណដល់ ក្រសួងសុខាភិបាល មនី្ទរសុខាភិបាលរាជធានីភ្នំពេញ ដែលបានយកចិត្តទុកដាក់ដល់ប្រជាពលរដ្ឋ ដោយចុះមកអប់រំផ្សព្វផ្សាយអំពីវិធានការការពារជំងឺគ្រុនឈាម ដាក់ថ្នាំបែត និងបាញ់ថ្នាំសម្លាប់មូស។

លោកវេជ្ជបណ្ឌិត អ៊ឹម វិសិដ្ឋ ប្រធានការិយាល័យសុខាភិបាលស្រុកប្រតិបតិ្តដង្កោ (ហៅកាត់ OD ដង្កោ) ក៏បានអំពាវនាវដល់ប្រជាពលរដ្ឋរស់នៅតាមមូលដ្ឋាននានា ក្នុងខណ្ឌដង្កោរាជធានីភ្នំពេញ សូមចូលរួមសហការ ជាមួយមន្ត្រីមន្ទីរសុខាភិបាល ដែលចុះធ្វើសកម្មភាពដាក់ថ្នាំអាបែត ដើម្បីកំចាត់មូសខ្លាលុបបំបាត់ជំងឺគ្រុនឈាម ឲ្យបានទាំងអស់គ្នា នៅតាមខ្នងផ្ទះរបស់បងប្អូន និងត្រូវចូលរួមសម្អាតបរិស្ថាននៅជុំវិញលំនៅដ្ឋានរបស់ខ្លួន ឲ្យមានអនាម័យល្អ ដើម្បីឈានទៅលុបបំបាត់ជម្រកមូសខ្លាពងកូន ដែលជាប្រភពចម្លងជំងឺគ្រុនឈាម។ គ្មានដង្កូវទឹក គ្មានមូសខ្លា គ្មានគ្រុនឈាម។

សូមរំលេចឡើងវិញថា សកម្មភាពប្រយុទ្ធ នឹងជំងឺគ្រុនឈាម របស់មជ្ឈមណ្ឌលជាតិប្រយុទ្ធនឹងជំងឺគ្រុនចាញ់ ប៉ារ៉ាស៊ីតសាស្រ្ត និងបាណកសាស្រ្ត (ម.គ.ច) គឺត្រូវ៖ ពង្រឹងសកម្មភាពសម្របសម្រួលកម្មវិធី និងកិច្ចសហការ ប្រព័ន្ធអង្កេតតាមដាន ការធ្វើរោគវិនិច្ឆ័យនិងព្យាបាល គ្រប់គ្រងភ្នាក់ងារចម្លង និង អប់រំសុខភាព បែបបុរេសកម្ម ដើម្បីប្រសិទ្ធភាពកាត់បន្ថយបន្ទុកជំងឺគ្រុនឈាម និងអត្រាស្លាប់។ ជាជំនួយស្មារតី ជំងឺគ្រុនឈាម គឺជាជំងឺដែលមានវដ្តពាក់ព័ន្ធជាមួយការប្រែប្រួលប្រភេទសេរ៉ូទីបវីរុស ដែលក្នុងឆ្នាំ២០២៥នេះ ជំងឺគ្រុនឈាមអាចកើតមានក្នុងសន្ទស្សន៍ព្យាករណ៍ពី ៣ម៉ឺន-៧៦,០០០ ករណីឈឺ។ ពង្រឹង និងពង្រីកវិសាលភាពល្បឿននៃការបញ្ជូនអ្នកជំងឺបន្ទាប់ពីគ្រុនក្តៅខ្លាំងភ្លាមៗ មិនលើសពី៤៨ម៉ោង ទៅស្វែងរកសេវាព្យាបាលសាធារណៈដែលនៅជិតបំផុត ពិសេសកុមារតូចៗ និងចាស់ជរា៕

អត្ថបទ រដ្ឋា