ពិភពលោក៖ ក្រុមហ៊ុន​អាកាសចរណ៍​ទូទាំង​ពិភពលោក​ បាន​លុបចោល​ជើង​ហោះហើរ​សម្រាប់​ថ្ងៃ​ទី​៣ ​បន្តបន្ទាប់​គ្នា​ដល់​ថ្ងៃអាទិត្យ ខណៈ​ដែល​បុគ្គលិក​ក្រុមហ៊ុន​អាកាសចរណ៍​ទាំងអស់​ត្រូវ​បាន​ដាក់​ឲ្យ​សម្រាក ស្រប​ពេល​មានការ​ឆ្លង​រាលដាល​វីរុស COVID-19 ប​ម្លែ​ង​ខ្លួន​ថ្មី Omicron កើន​ឡើង​ខ្ពស់ ដែល​បង្ខំ​ឲ្យ​អ្នក​ធ្វើ​ដំណើរ​ក្នុង​ឱកាស​បុណ្យ​ណូអែល​រាប់​ម៉ឺន​នាក់ ផ្លាស់ប្ដូរ​ផែនការ​របស់​ខ្លួន​។​

យោង​តាម​គេហទំព័រតាមដាន​ការហោះហើរ​ឲ្យដឹងថា ជើង​ហោះ​ហើរ​ជាង ​៦,០០០ ត្រូវ​បាន​លុបចោល​នៅ​ទូទាំង​ពិភពលោក​ក្នុង​អំឡុង​បុណ្យ​ណូអែល​ចុង​សប្ដាហ៍ និង​មនុស្ស​រាប់​ពាន់​នាក់​ត្រូវ​បាន​ពន្យារ​ពេល​ថែមទៀត ស្រប​ពេល​ការ​ឆ្លង​រាលដាល​ខ្លាំង​នៃ​វីរុស​ប​ម្លែ​ង​ខ្លួន​ថ្មី Omicron បង្ក​ការ​អាក់​ខាន​ដល់​ពេល​វេលា​ឈប់សម្រាក​លើ​មនុស្ស​រាប់​លាន​នាក់​។ ទិន្នន័យ​របស់​ក្រុមហ៊ុន Flight Aware បាន​បង្ហាញ​ថា ក្រុមហ៊ុន​អាកាសចរណ៍​នៅ​ទូទាំង​ពិភពលោក បាន​លុបចោល​ជើង​ហោះ​ហើរ​ប្រមាណ ២,២០០ គិត​ត្រឹម​ព្រឹក​ថ្ងៃអាទិត្យ ថយ​ចុះ​ពី​ជាង ២,៨០០ ពីមួយ​ថ្ងៃមុន។

​យោង​តាម​ប្រភព​ពី​ក្រុមហ៊ុន Flight Aware ដដែល ក្រុមហ៊ុន​អាកាសចរណ៍​ផ្នែក​ពាណិជ្ជកម្ម​នានា បាន​លុបចោល​ជើង​ហោះ​ហើរ​ជាង ​៧២០ ទាំង​ចូល ឬ​ចេញពី​សហរដ្ឋអាមេរិក​កាលពី​ថ្ងៃអាទិត្យ​។ អ្នកបើកបរ​យន្តហោះ អ្នកបម្រើ​ការ​លើ​យន្តហោះ និង​បុគ្គលិក​ផ្សេងទៀតត្រូវ​បាន​បញ្ជាក់​ថា​ បាន​ឈឺ ឬ​ដាក់​ឲ្យ​នៅ​ដាច់ដោយឡែក បន្ទាប់ពី​បាន​ប៉ះពាល់​ជាមួយ​អ្នក​ឆ្លង​វីរុស COVID-19 ដែល​បង្ខំ​ឲ្យ​ក្រុម​ហ៊ុន​អាកាសចរណ៍ Lufthansa, Delta, United Airlines, JetBlue, Alaska Airlines និង​ក្រុមហ៊ុន​អាកាស​ចរណ៍​ជាច្រើន​បាន​លុបចោល​ជើង​ហោះ​ហើរ អំឡុង​ពេល​ដែល​មាន​អ្នកដំណើរ​ច្រើននៅ​ឆ្នាំនេះ​។ ក្រុម​ហ៊ុន​ Flight Aware ខាងលើ​ដដែល​បាន​និយាយ​ថា​ ​​​ជើង​ហោះ​ហើរ​ជាង​ ១,៤០០ ត្រូវ​បាន​លុប​ចោល​នៅ​ថ្ងៃ​ចន្ទ​នេះ ខណៈ​ដែល​ក្រុម​ហ៊ុន​ជើង​ហោះ​ហើរ​របស់​អាមេរិកកំពុង​រង​ការ​ប៉ះពាល់​ធ្ងន់ធ្ងរ​ជាង​គេ​បំផុត៕

អត្ថបទ៖ សុខមាន