ប្រធានាធិបតីសហរដ្ឋអាមេរិក លោក Donald Trump បាននិយាយកាលពីថ្ងៃសុក្រ ទៅ២០ មិថុនា ថា ប្រទេសអ៊ីរ៉ង់មានពេលវេលាច្រើនបំផុតពីរសប្តាហ៍ ដើម្បីបញ្ចៀសការវាយប្រហារតាមអាកាសរបស់សហរដ្ឋអាមេរិកដែលអាចកើតមាន ខណៈអ៊ីស្រាអែលបានអះអាងថា ខ្លួនបានទាញថយក្រោយកម្មវិធីនុយក្លេអ៊ែរដែលរំពឹងទុករបស់អ៊ីរ៉ង់រួចហើយ ដោយចាប់ផ្តើមឡើងវិញយ៉ាងហោចណាស់ពីរឆ្នាំក្រោយ។

លោក Trump នៅពេលត្រូវបានសួរដោយអ្នកសារព័ត៌មានថាតើលោកអាចសម្រេចចិត្តវាយប្រហារអ៊ីរ៉ង់មុនពេលនោះដែរទេ លោកនិយាយថា «ខ្ញុំកំពុងផ្តល់ឱ្យនូវអំឡុងពេលមួយ ហើយខ្ញុំបាននិយាយថា ពីរសប្តាហ៍គឺជាពេលវេលាច្រើនបំផុត»។ 

ការអត្ថាធិប្បាយចុងក្រោយរបស់លោក Trump បានបង្ហាញថាលោកអាចធ្វើការសម្រេចចិត្តមុនពេលកំណត់រយៈពេលពីរសប្តាហ៍ ខណៈលោកបានច្រានចោលកិច្ចខិតខំប្រឹងប្រែងរបស់អឺរ៉ុប ដើម្បីបញ្ចប់ជម្លោះ និងបាននិយាយថា វានឹង «ពិបាកខ្លាំង» ក្នុងការស្នើសុំឱ្យអ៊ីស្រាអែលបញ្ឈប់ការវាយប្រហាររបស់ខ្លួន។

លោកTrump និយាយថា «អ៊ីរ៉ង់ មិនចង់និយាយជាមួយអឺរ៉ុបទេ។ ប្រទេសនេះចង់និយាយជាមួយយើង។ អឺរ៉ុប នឹងមិនអាចជួយអ្វីក្នុងរឿងនេះបានទេ»។ ការផ្ទុះជាបន្តបន្ទាប់ត្រូវបានគេឮនៅក្នុងទីក្រុងតេអេរ៉ង់ កាលពីថ្ងៃសុក្រ ខណៈអ៊ីស្រាអែលបានវាយប្រហារទ្រង់ទ្រាយធំជាបន្តបន្ទាប់ ដែលខ្លួននិយាយថាមានគោលបំណងបញ្ឈប់អ៊ីរ៉ង់ពីការអភិវឌ្ឍអាវុធនុយក្លេអ៊ែរ ជាមហិច្ឆតាដែលទីក្រុងតេអេរ៉ង់បានបដិសេធ។

រដ្ឋមន្ត្រីការបរទេសអ៊ីស្រាអែល លោក Gideon Saar បាននិយាយនៅក្នុងបទសម្ភាសន៍មួយដែលបានចេញផ្សាយថា «យោងទៅតាមការវាយតម្លៃដែលយើងបានឮ យើងបានពន្យារពេលយ៉ាងហោចណាស់ពីរឬបីឆ្នាំក្រោយរួចហើយ នូវលទ្ធភាពសម្រាប់ពួកគេដើម្បីមានគ្រាប់បែកនុយក្លេអ៊ែរ»។