ប្រទេសអ៊ីស្រាអែល និងអ៊ីរ៉ង់ បានបន្តវាយប្រហារគ្នា ទោះបីជាមានកិច្ចខិតខំប្រឹងប្រែងផ្នែកការទូតពីសំណាក់មេដឹកនាំនៅជុំវិញពិភពលោកក៏ដោយ។ កងកម្លាំងការពារអ៊ីស្រាអែល បាននិយាយកាលពីថ្ងៃសុក្រថា ពួកគេបានធ្វើប្រតិបត្តិការនៅភាគខាងលិច និងភាគពាយ័ព្យប្រទេសអ៊ីរ៉ង់ ដោយបំផ្លាញទីតាំងស្តុកមីស៊ីល និងទីតាំងបាញ់។

រដ្ឋមន្ត្រីការពារជាតិ លោក Israel Katz បានបញ្ជាឱ្យកងកម្លាំងការពារអ៊ីស្រាអែល បើកការវាយប្រហារប្រឆាំងកងឆ្មាំបដិវត្តន៍ និងកងជីវពលស្ម័គ្រចិត្ត Basij ។ ទីភ្នាក់ងារសារព័ត៌មាន Tasnim ដែលមានទំនាក់ទំនងជាមួយឆ្មាំបដិវត្តន៍ បាននិយាយកាលពីថ្ងៃសុក្រថា កងកម្លាំងរបស់ខ្លួន បានវាយបកវិញដោយមីស៊ីលបាលីស្ទីក និងយានដ្រូន។ ការវាយប្រហារទាំងនេះ ត្រូវបានគេរាយការណ៍ថាបានធ្វើឱ្យមនុស្ស២៣នាក់រងរបួសនៅក្នុងទីក្រុង Haifa របស់អ៊ីស្រាអែលភាគខាងជើង ។

ប្រជាជននៅទីក្រុងតេអេរ៉ង់ បានចេញធ្វើបាតុកម្មបន្ទាប់ពីការបួងសួងកាលពីថ្ងៃសុក្រ ដើម្បីតវ៉ាប្រឆាំង ការវាយប្រហាររបស់អ៊ីស្រាអែល។ ពួកគេបានកាន់រូបភាពរបស់មេដឹកនាំកំពូល លោក Ayatollah Ali Khamenei ខណៈកំពុងស្រែកថា «ស្លាប់ទៅអ៊ីស្រាអែល»។ មេដឹកនាំអ៊ីស្រាអែល បាននិយាយថាគោលដៅនានាដែលនៅសេសសល់របស់ខ្លួន គឺការកម្ទេចទីតាំងចម្រាញ់សារធាតុអ៊ុយរ៉ានីញ៉ូម Fordow នៅ ប្រទេសអ៊ីរ៉ង់ភាគកណ្តាល។ រោងចក្រនេះ ត្រូវបានគេជឿថាមានទីតាំងនៅក្រោមដីដ៏ជ្រៅ។

លោក Steve Ganyard អតីតឧបការីរងរដ្ឋមន្ត្រីការបរទេសសហរដ្ឋអាមេរិក ដែលធ្លាប់បម្រើការជាអ្នកបើកយន្តហោះចម្បាំងរបស់កងម៉ារីន បាននិយាយថា ការបំផ្លាញរោងចក្រនេះនឹងមានបញ្ហាប្រឈម។ លោកនិយាយថា ប្រសិនបើសហរដ្ឋអាមេរិកសម្រេចចិត្តចូលរួម យោធានឹងត្រូវដាក់ពង្រាយគ្រាប់បែកដែលគេស្គាល់ថាជា «គ្រាប់បែកខួងទម្លុះដី»។