សំឡេងឧទ្ធម្ភាគចក្របានលាន់ឮកងរំពង នៅក្បែរភ្នំភ្លើងដែលកំពុងបញ្ចេញអណ្ដាតភ្លើងច្រាលក្រហមឆ្អៅ ខណៈទូកបានជួយសង្គ្រោះមនុស្សក្លែងក្លាយពីសមុទ្រ ក្នុងសប្តាហ៍នេះ ដោយនេះគឺជាការបង្ហាញនូវសាមគ្គីភាពដែនសមុទ្រពីសំណាក់ប្រទេសជប៉ុន សហរដ្ឋអាមេរិក និងហ្វីលីពីន។

រូបភាពទាំងនោះ គឺជាសមយុទ្ធឆ្មាំល្បាតឆ្នេររួមគ្នា ដែលត្រូវបានធ្វើឡើងនៅឆ្នេរភាគនិរតីរបស់ប្រទេសជប៉ុន បន្ទាប់ពីប្រទេសទាំង៣ បានចេញការព្រមាន ពាក់ព័ន្ធនឹងសកម្មភាពរបស់ចិន នៅក្នុងដែនទឹកក្នុងតំបន់ដែលមានជម្លោះ។ ហើយភាពតានតឹងរវាងចិន និងភាគីអះអាងសិទ្ធិផ្សេងទៀត លើផ្នែកខ្លះនៃសមុទ្រចិនខាងកើត និងខាងត្បូង បានជំរុញឲ្យជប៉ុនបង្កើនទំនាក់ទំនងកាន់តែស៊ីជម្រៅជាមួយហ្វីលីពីន និងសហរដ្ឋអាមេរិក។

សប្តាហ៍នេះ គឺជាលើកទី២ ហើយ ដែលឆ្មាំល្បាតឆ្នេររបស់ប្រទេសទាំងនេះ បានធ្វើសមយុទ្ធហ្វឹកហ្វឺនរួមគ្នា ហើយជាលើកទី១ នៅក្នុងប្រទេសជប៉ុន។ ការហាត់សមនេះបានកើតឡើងរយៈពេល ៥ថ្ងៃ នៅឆ្នេរ Kagoshima ជាកន្លែងដែលភ្នំភ្លើង Sakurajima គ្របដណ្ដប់ផ្ទៃមេឃដោយការបញ្ចេញផ្សែង និងព្រួសផេះយ៉ាងស្ងាត់ៗ។

បុគ្គលិករាប់សិបនាក់បានចូលរួមក្នុងហ្វឹកហាត់នេះ ដោយសមយុទ្ធចុងក្រោយ កាលពីថ្ងៃសុក្រ (ទី២០ ខែមិថុនា) មាននាវាមួយគ្រឿងៗមកពីឆ្មាំល្បាតឆ្នេរនៃប្រទេសទាំង៣។ ឆ្មាំល្បាតឆ្នេរអាមេរិកត្រូវបានតំណាងដោយនាវា Stratton ដែលអាចផ្ទុកបុគ្គលិករហូតដល់ ១៧០នាក់ ហើយជប៉ុនតំណាងដោយនាវា Asanagi ទម្ងន់ ៦.០០០តោន។

នាវាទាំង២ ត្រូវបានចូលរួមដោយនាវា BRP Teresa Magbanua ដែលត្រូវបានផ្តល់ឲ្យហ្វីលីពីនដោយប្រទេសជប៉ុន តាមរយៈកិច្ចព្រមព្រៀងប្រាក់កម្ចី។ នាវានេះទម្ងន់ ២.២៦៥តោន ត្រូវបានដាក់ឈ្មោះតាមគ្រូបង្រៀន និងជាអ្នកបដិវត្តន៍ ដែលវាជាធម្មតាប្រតិបត្តិការត្រួតពិនិត្យទូករបស់ចិន នៅសមុទ្រចិនខាងត្បូង៕