គ្រួសារអ្នកនយោបាយដ៏លេចធ្លោបំផុតរបស់ប្រទេសថៃ កំពុងស្ថិតក្នុងដំណាក់កាលបាត់បង់អំណាចជាថ្មីម្តងទៀត។ លោកស្រីនាយករដ្ឋមន្ត្រី Paetongtarn Shinawatra (ផែថងថាន ស៊ីណាវ៉ាត់) កំពុងប្រឈមនឹងការតវ៉ាតាមដងផ្លូវ និងការអំពាវនាវខ្លាំងឡើងៗឲ្យលាលែងពីតំណែង ក្នុងពេលមានកំហឹងមិនថមថយ ចំពោះការលេចធ្លាយសំឡេងសន្ទនាតាមទូរសព្ទ ដែលនៅក្នុងសារនោះលោកស្រីបាននិយាយយោងទៅដល់មេបញ្ជាការកងទ័ពថៃ។

ភាពចម្រូងចម្រាសបានជំរុញឲ្យគណបក្សធំបំផុតទី២ នៅក្នុងរដ្ឋាភិបាលចម្រុះដែលមានភាពផុយស្រួយរួចហើយរបស់ប្រទេសថៃ បានប្រកាសដកខ្លួនកាលពីថ្ងៃទី១៨ ខែមិថុនា ដោយនិយាយថា លោកស្រី Paetongtarn បានធ្វើឲ្យខូចសេចក្តីថ្លៃថ្នូររបស់ប្រទេស។

ប្រសិនបើសម្ព័ន្ធមិត្តសំខាន់ផ្សេងទៀតដកខ្លួនចេញពីសម្ព័ន្ធភាពដែរនោះ ក្រុមចម្រុះរបស់លោកស្រី Paetongtarn នឹងត្រូវក្លាយទៅជារដ្ឋាភិបាលសំឡេងភាគតិច នៅក្នុងសភាជាន់ទាប។ លោកស្រីអាចនឹងត្រូវបង្ខំឲ្យចុះចេញពីតំណែង ឬប្រកាសការបោះឆ្នោតមុនអាណត្តិ ដើម្បីបញ្ចៀសវិបត្តិអូសបន្លាយ។

ដោយបានជាប់ឆ្នោតតាមរយៈការបោះឆ្នោតសភា ក្នុងខែសីហា ឆ្នាំ២០២៤ ក្នុងនាមជាមេដឹកនាំវ័យក្មេងបំផុតដំបូងគេរបស់ប្រទេសនេះ លោកស្រី Paetongtarn អាចក្លាយជាអ្នកនយោបាយទី៣ នៅក្នុងគ្រួសារត្រកូលស៊ីណាវ៉ាត់ ដែលបាត់បង់អំណាច មុនបញ្ចប់អាណត្តិដឹកនាំរបស់ពួកគេ។

ភាពចលាចលនេះនឹងក្លាយជាការសាកល្បងនៃលទ្ធិប្រជាធិបតេយ្យរបស់ថៃ ដែលពីមុនត្រូវបានរំខានដោយរដ្ឋប្រហារជាច្រើនលើក ខណៈដែលស្ថាប័នរាជានិយម បានរៀបចំនូវការគ្រប់គ្រងដែលគាំទ្រដោយយោធាជាយូរណាស់មកហើយ៕