ប្រធានាធិបតីរុស្ស៊ី លោក Vladimir Putin កាលពីថ្ងៃសុក្រ (ទី២០ ខែមិថុនា) បាននិយាយថា លោកមិនបាន «មិនបដិសេធ» នោះឡើយ ដែលថា កងកម្លាំងរបស់លោកប៉ុនប៉ងដណ្តើមកាន់កាប់ទីក្រុង Sumy នៅភាគឦសាននៃប្រទេសអ៊ុយក្រែននោះទេ ដោយពាក្យសម្ដីបានបង្កើតឲ្យមានភាពមិនច្បាស់លាស់ថ្មី ជុំវិញការរំពឹងទុកនៃកិច្ចចរចាសន្តិភាព រវាងទីក្រុងមូស្គូ និងទីក្រុងគីវ។

អ៊ុយក្រែនបានលើកឡើងថា ការអធិប្បាយរបស់លោក Putin បានបង្ហាញពីការមើលងាយ ចំពោះដំណើរការសន្តិភាព។ កិច្ចប្រឹងប្រែងការទូត ដើម្បីបញ្ចប់ជម្លោះរយៈពេល ៣ឆ្នាំ បានជាប់គាំងក្នុងប៉ុន្មានសប្តាហ៍ថ្មីៗនេះ ហើយទីក្រុង Kyiv បានចោទប្រកាន់ទីក្រុងមូស្គូពីចេតនាបំផ្លាញកិច្ចព្រមព្រៀងសន្តិភាព ដើម្បីអូសបន្លាយការវាយលុកទ្រង់ទ្រាយធំរបស់ខ្លួន។

គួរបញ្ជាក់ថា បច្ចុប្បន្ន រុស្ស៊ីកាន់កាប់ប្រហែល ១ភាគ៥ នៃដែនដីរបស់អ៊ុយក្រែន ហើយបានទាមទារតំបន់ចំនួន៤ របស់អ៊ុយក្រែនជាកម្មសិទ្ធិរបស់ខ្លួន ចាប់តាំងពីការចាប់ផ្តើមការវាយលុករបស់ខ្លួន ក្នុងឆ្នាំ២០២២ បន្ថែមពីលើតំបន់គ្រីម៉ាដែលខ្លួនបានកាន់កាប់ក្នុងឆ្នាំ២០១៤។

Sumy មិនមែនជាតំបន់មួយ ក្នុងចំណោមតំបន់ដែលក្រុងមូស្គូបានបញ្ចូលជាដែនដីឧបសម្ព័ន្ធផ្លូវការនោះទេ បើទោះបីជាថ្មីៗនេះ កងកម្លាំងរុស្ស៊ីបានចូលទៅដល់ទីនោះជាលើកដំបូង ក្នុងរយៈពេល ៣ឆ្នាំក៏ដោយ។ នៅឯវេទិកាសេដ្ឋកិច្ចដ៏សំខាន់បំផុតរបស់រុស្ស៊ី នៅទីក្រុង Saint Petersburg លោក Putin បានលើកឡើងថា ទីក្រុងមូស្គូអាចយកទីក្រុង Sumy ជាផ្នែកនៃការបង្កើត «តំបន់ទ្រនាប់» នៅតាមបណ្តោយព្រំដែន ហើយបានបញ្ជាក់ឡើងវិញម្ដងទៀតនូវការបដិសេធ អំពីភាពជារដ្ឋរបស់អ៊ុយក្រែន៕