ប្រទេសរុស្ស៊ីបានចុះហត្ថលេខាលើកិច្ចព្រមព្រៀងវិនិយោគជាមួយសហភាពមីយ៉ាន់ម៉ា កាលពីថ្ងៃសុក្រ (ទី២០ ខែមិថុនា) ជាអ្វីដែលទីក្រុងមូស្គូបានចាត់ទុកថា អាចជាការបើកឱកាសថ្មី សម្រាប់ក្រុមហ៊ុនថាមពលរុស្ស៊ី នៅក្នុងប្រទេសអាស៊ីមួយនេះ។

បន្ទាប់ពីបានចុះហត្ថលេខាលើកិច្ចព្រមព្រៀង នៅទីក្រុង St Petersburg ជាមួយលោក Kan Zaw រដ្ឋមន្ត្រីក្រសួងវិនិយោគ និងទំនាក់ទំនងសេដ្ឋកិច្ចបរទេសរបស់មីយ៉ាន់ម៉ា រដ្ឋមន្ត្រីក្រសួងសេដ្ឋកិច្ចរុស្ស៊ី លោក Maxim Reshetnikov បាននិយាយថា៖ «យើងកត់សម្គាល់ឃើញជាពិសេសពីការត្រៀមខ្លួនរបស់ភាគីមីយ៉ាន់ម៉ា ក្នុងការទាក់ទាញក្រុមហ៊ុនរុស្ស៊ីឲ្យចូលរួមក្នុងការអភិវឌ្ឍតំបន់ប្រេង និងឧស្ម័ន នៅសមុទ្រ»។

ជាមួយគ្នានេះ រុស្ស៊ីបានបញ្ជាក់ថា កិច្ចព្រមព្រៀងនេះនឹងជួយពន្លឿនដល់គម្រោងនានា ក្នុងនោះរួមទាំងគម្រោងនៅតំបន់សេដ្ឋកិច្ចពិសេស Dawei របស់ប្រទេសមីយ៉ាន់ម៉ាផងដែរ ជាកន្លែងដែលរោងចក្រថាមពលកម្ដៅដើរដោយធ្យូងថ្ម ៦៦០មេហ្កាវ៉ាត់ កំពុងត្រូវបានអភិវឌ្ឍ។

គួរបញ្ជាក់ថា ប្រទេសរុស្ស៊ីបាននិងកំពុងកសាងទំនាក់ទំនងកាន់តែជិតស្និទ្ធជាមួយរបបយោធាមីយ៉ាន់ម៉ា ដែលបានដណ្តើមអំណាចនៅឆ្នាំ២០២១ ដោយការផ្តួលរំលំរដ្ឋាភិបាលជាប់ឆ្នោតរបស់ម្ចាស់ពានរង្វាន់ណូបែលសន្តិភាព គឺលោកស្រី អ៊ុងសាន ស៊ូជី។

បើយោងតាមអង្គការសហប្រជាជាតិ បានឲ្យដឹងថា ប្រទេសនេះកំពុងជួបនឹងការលំបាកខ្លាំង ដោយសារជម្លោះផ្ទៃក្នុង សេដ្ឋកិច្ចធ្លាក់ចុះ ការរីករាលដាលនូវភាពអត់ឃ្លាន ហើយ ១ភាគ៣ នៃប្រជាជន ៥៥លាននាក់របស់ប្រទេសត្រូវការជំនួយ។ ប្រមុខរបបយោធា លោក Min Aung Hlaing បានជួបជាមួយប្រធានាធិបតីរុស្ស៊ីលោក Vladimir Putin កាលពីខែមីនា ហើយបានចុះហត្ថលេខាលើកិច្ចព្រមព្រៀង ស្តីពីការសាងសង់រោងចក្រនុយក្លេអ៊ែរខ្នាតតូច នៅមីយ៉ាន់ម៉ា៕