នៅក្នុងបទសម្ភាសន៍ជាមួយសារព័ត៌មាន Times of India នាថ្ងៃសោរ៍ (ទី២១ ខែមិថុនា) នេះ រដ្ឋមន្ត្រីក្រសួងមហាផ្ទៃ លោក Amit Shah បានប្រាប់ថា ប្រទេសឥណ្ឌានឹងមិនស្តារសន្ធិសញ្ញាចែករំលែកទឹក Indus (Indus Waters Treaty) ជាមួយទីក្រុង Islamabad នោះឡើយ ហើយទឹកដែលហូរទៅកាន់ប្រទេសប៉ាគីស្ថាន នឹងត្រូវបង្វែរទៅប្រើប្រាស់ក្នុងប្រទេស។

គួររំលឹកថា ឥណ្ឌាបានដាក់ចេញ «វិធានការផ្អាក» នូវការចូលរួមរបស់ខ្លួន នៅក្នុងសន្ធិសញ្ញាឆ្នាំ១៩៦០ ដែលគ្រប់គ្រងការប្រើប្រាស់ប្រព័ន្ធទន្លេ Indus បន្ទាប់ពីជនស៊ីវិល ២៦នាក់ នៅតំបន់ Kashmir របស់ឥណ្ឌា ត្រូវបានសម្លាប់ ជាអ្វីដែលទីក្រុង Delhi ពិពណ៌នាថា ជាអំពើភេរវកម្ម។

សន្ធិសញ្ញានោះបានធានាដល់លទ្ធភាពទទួលបានទឹកប្រើប្រាស់ សម្រាប់ ៨០ភាគរយនៃកសិដ្ឋានរបស់ប្រទេសប៉ាគីស្ថាន តាមរយៈទន្លេចំនួន៣ ដែលមានប្រភពពីឥណ្ឌា។

ប៉ាគីស្ថានបានបដិសេធមិនមានជាប់ពាក់ព័ន្ធក្នុងហេតុការណ៍នោះទេ ប៉ុន្តែកិច្ចព្រមព្រៀងនេះ នៅតែមិនដំណើរការឡើងវិញដដែល បើទោះបីជាប្រទេសជិតខាងប្រដាប់អាវុធនុយក្លេអ៊ែរទាំង២ បានព្រមព្រៀងគ្នាឈានដល់បទឈប់បាញ់កាលពីខែឧសភា ក្រោយមានការប្រយុទ្ធគ្នាដ៏អាក្រក់បំផុតជាលើកដំបូង ក្នុងរយៈពេលជាច្រើនទសវត្សរ៍មកនេះ។

លោក Shah បានប្រាប់សារព័ត៌មានចុះផ្សាយប្រចាំថ្ងៃថា៖ «ទេ វានឹងមិនអាចត្រូវបានស្តារឡើងវិញទេ»។ ដោយសំដៅទៅរដ្ឋ នៅភាគពាយ័ព្យនៃប្រទេសឥណ្ឌា លោក Shah បានបញ្ជាក់ថា៖ «យើងនឹងយកទឹកដែលហូរទៅប៉ាគីស្ថានបង្វែរទៅកាន់រដ្ឋ Rajasthan ដោយការសាងសង់ប្រឡាយ។ ប៉ាគីស្ថាននឹងត្រូវខ្វះខាតទឹកដែលខ្លួនបាននិងកំពុងទទួលបានដោយអយុត្តិធម៌»៕