លោកប្រធានាធិបតី Donald Trump បាននិយាយកាលពីថ្ងៃសៅរ៍ ២១ មិថុនាថា កងកម្លាំងសហរដ្ឋអាមេរិក បានវាយប្រហារទីតាំងនុយក្លេអ៊ែរអ៊ីរ៉ង់ចំនួនបីនៅក្នុង "ការវាយប្រហារប្រកបដោយជោគជ័យ" ដោយបន្ថែមថាកម្មវិធីនុយក្លេអ៊ែររបស់ទីក្រុង តេអេរ៉ង់ (Tehran) ត្រូវបានលុបបំបាត់ចោល។

លោកTrump បានសរសេរនៅលើប្រព័ន្ធផ្សព្វផ្សាយសង្គមកាលពីថ្ងៃសៅរ៍ថា "យើងបានបញ្ចប់ការវាយប្រហារប្រកបដោយជោគជ័យរបស់យើងទៅលើទីតាំងនុយក្លេអ៊ែរចំនួនបីនៅក្នុងប្រទេសអ៊ីរ៉ង់ រួមមានរោងចក្រនុយក្លេអ៊ែរ Fordo, Natanz និង Esfahan" ។  

លោក Trump និយាយថា រោងចក្រនុយក្លេអ៊ែរនានារបស់អ៊ីរ៉ង់ ត្រូវបានបំផ្លាញទាំងស្រុងក្រោយការវាយប្រហាររបស់អាមេរិក និងប្ដេជ្ញាវាយប្រហារបន្ថែមទៀត។

បន្ទាប់ពីមានការពិចារណាជាច្រើនថ្ងៃ និងជាយូរមកហើយ មុនពេលកំណត់រយៈពេលពីរសប្តាហ៍ដែលកំណត់ដោយរូបលោកខ្លួនឯង ការសម្រេចចិត្តរបស់លោក Trump ក្នុងការចូលរួមយុទ្ធនាការយោធារបស់អ៊ីស្រាអែលប្រឆាំងនឹងគូប្រជែងដ៏សំខាន់របស់ខ្លួនគឺអ៊ីរ៉ង់ តំណាងឱ្យការកើនឡើងនៃជម្លោះកាន់តែខ្លាំងក្លាថែមទៀត។

លោក Trump បាននិយាយនៅក្នុងសុន្ទរកថាតាមទូរទស្សន៍នៅឯសេតវិមានថាការវាយប្រហារទាំងនោះ គឺជាជោគជ័យខាងយោធាដ៏អស្ចារ្យ ។ 

សារព័ត៌មាន CBS News បានរាយការណ៍ថា សហរដ្ឋអាមេរិកបានឈានដល់ការវាយប្រហារលើអ៊ីរ៉ង់កាលពីថ្ងៃសៅរ៍ តែបាននិយាយថា ការវាយប្រហារនេះគឺជាផែនការរបស់សហរដ្ឋអាមេរិកទាំងអស់ ហើយខ្លួនពុំមានបំណងសម្រាប់ការផ្លាស់ប្តូររបបនោះទេ៕