មនុស្សរាប់ម៉ឺននាក់កាលពីថ្ងៃសៅរ៍ ២១មិថុនា បានចូលរួមក្នុងបាតុកម្មគាំទ្រប៉ាឡេស្ទីននៅទីក្រុងប៊ែរឡាំង ប្រទេសអាល្លឺម៉ង់ និងរដ្ឋធានីជាច្រើនទូទាំងសហភាពអឺរ៉ុប ទាមទារឱ្យបញ្ចប់អំពើប្រល័យពូជសាសន៍នៅហ្កាហ្សា ។

លោក Niklas Barth អ្នកតវ៉ាមកពីទីក្រុង Frankfurt បាននិយាយថា អាល្លឺម៉ង់ត្រូវតែបញ្ឈប់ការគាំទ្រ និងលាងជម្រះអំពើប្រល័យពូជសាសន៍នេះ ទៅតាមកម្រិតសីលធម៌។ បញ្ឈប់ការផ្គត់ផ្គង់អាវុធដល់អ៊ីស្រាអែល។ អាល្លឺម៉ង់ មិនអាចជាប់ពាក់ព័ន្ធក្នុងអំពើប្រល័យពូជសាសន៍ទៀតឡើយ។

យោងតាមអ្នកនាំពាក្យរបស់នាយកដ្ឋាននគរបាលទីក្រុងប៊ែរឡាំង មានមនុស្សចំនួន១៥.០០០នាក់ ចូលរួមបាតុកម្មនៅក្នុងរដ្ឋធានីនេះ។ការតវ៉ាបានចាប់ផ្តើមដោយស្ងៀមស្ងាត់ ប៉ុន្តែត្រូវបានបញ្ចប់ដោយការប៉ះទង្គិចគ្នា និងមានការចាប់ខ្លួនប្រហែល ៥០ នាក់។

ចំណែកនៅរដ្ឋធានីរបស់អង់គ្លេសវិញ មនុស្សរាប់ម៉ឺននាក់បានក្រវីទង់ជាតិប៉ាឡេស្ទីន បង្ហាញការគាំទ្រ និងប្រឆាំងការកាប់សម្លាប់ដែលនៅតែបន្តរាល់ថ្ងៃ។ 

រីឯនៅប្រទេសស្វីសឯណោះ ក្រុមអ្នករៀបចំក្បួនតវ៉ាបានប៉ាន់ប្រមាណថាមនុស្ស២០.០០០នាក់ បានចូលរួមនៅមុខអគាររដ្ឋសភា ជំរុញឲ្យរដ្ឋាភិបាលគាំទ្របទឈប់បាញ់។ 

បាតុករម្នាក់បាននិយាយថា បាតុកម្មប្រឆាំងនឹងមនុស្សពីរបីនាក់ដែលគាំទ្រអ៊ីស្រាអែលបានបង្កភាពតានតឹង។ អ្នកចូលរួមទាមទារឲ្យរដ្ឋាភិបាលរបស់ពួកគេបញ្ចប់ការផ្គត់ផ្គង់អាវុធដល់អ៊ីស្រាអែល ហើយងាកទៅផ្ដល់ជំនួយសម្រាប់ប្រជាជននៅហ្កាហ្សាវិញ។

ការវាយលុកដោយយោធាជាបន្តបន្ទាប់របស់អ៊ីស្រាអែលលើតំបន់ហ្កាហ្សាបានសម្លាប់ប្រជាជនប៉ាឡេស្ទីនជិត៥៥.៧០០នាក់ នេះបើយោងតាមក្រសួងសុខាភិបាលរបស់ហ្កាហ្សា ខណៈប្រជាជនស្ទើរតែទាំងអស់ជាងពីរលាននាក់បានរត់គេចពីសេចក្ដីស្លាប់ឥតឈប់ឈរ និងបង្កឱ្យមានវិបត្តិអត់ឃ្លាន៕