ប្រតិកម្មជាសកលចំពោះការវាយប្រហារតាមអាកាសរបស់អាមេរិកលើទីតាំងនុយក្លេអ៊ែរអ៊ីរ៉ង់ចំនួនបីនៅថ្ងៃអាទិត្យ២២មិថុនា មានចាប់ពីការគាំទ្រយ៉ាងពេញទំហឹងពីសំណាក់អ៊ីស្រាអែល រហូតដល់ការអំពាវនាវជាបន្ទាន់ឱ្យមានការបន្ធូរបន្ថយភាពតានតឹងពីអង្គការសហប្រជាជាតិ និងប្រទេសមួយចំនួនទៀត។ 

ប្រទេសវ៉េណេស៊ុយអេឡា ថ្កោលទោសការឈ្លានពានរបស់យោធាអាមេរិកប្រឆាំងនឹងអ៊ីរ៉ង់ និងទាមទារឱ្យបញ្ឈប់ជាបន្ទាន់នូវអរិភាពនានា។

ក្រសួងការបរទេស និងប្រធានាធិបតីគុយបា អំពាវនាវជាបន្ទាន់ឱ្យមានការសន្ទនាការទូតដើម្បីសន្តិភាពរវាងភាគីពាក់ព័ន្ធក្នុងជម្លោះមជ្ឈិមបូព៌ា។

រដ្ឋមន្ត្រីការបរទេសនូវែលសេឡង់លោក WINSTON PETERS បានថ្កោលទោសយ៉ាងខ្លាំងចំពោះការទម្លាក់គ្រាប់បែករបស់អាមេរិកលើទីតាំងនុយក្លេអ៊ែររបស់អ៊ីរ៉ង់ ដែលរុញឲ្យមានការកើនឡើងដ៏គ្រោះថ្នាក់នៃជម្លោះនៅមជ្ឈិមបូព៌ា។

ចំណែកអ្នកនាំពាក្យរដ្ឋាភិបាលអូស្ត្រាលី បាននិយាយថាពួកលោកទទួលស្គាល់ស្ថានការណ៍វិវត្តន៍ក្នុងរយៈពេល ២៤ម៉ោងចុងក្រោយនេះ រួមទាំងការប្រកាសរបស់លោកប្រធានាធិបតី Trump អំពីការវាយប្រហាររបស់សហរដ្ឋអាមេរិកលើរោងចក្រនុយក្លេអ៊ែរនៅអ៊ីរ៉ង់ ប៉ុន្តែលោកអំពាវនាវឲ្យមានដំណោះស្រាយការទូតដើម្បីបន្ថយកម្ដៅភាពតានតឹង។

ចំណែកប្រទេសអ៊ីរ៉ាក់ បានព្រមាននៅថ្ងៃអាទិត្យទី២២មិថុនាថា ការវាយប្រហាររបស់អាមេរិកលើទីតាំងនុយក្លេអ៊ែររបស់ប្រទេសជិតខាងអ៊ីរ៉ង់គំរាមកំហែងដល់សន្តិភាព និងស្ថិរភាពនៅមជ្ឈិមបូព៌ា។

ជាមួយគ្នានោះ ក្រុមហ៊ួទីដែលជាសម្ព័ន្ធមិត្តរបស់អ៊ីរ៉ង់បានប្រកាសថាពួកគេនឹងបន្តការវាយប្រហារលើនាវាអាមេរិក៕