ពិភពលោកបានត្រៀមខ្លួនកាលពីថ្ងៃអាទិត្យ ២២ មិថុនា សម្រាប់ការឆ្លើយតបរបស់អ៊ីរ៉ង់ បន្ទាប់ពីសហរដ្ឋអាមេរិកបានវាយប្រហារទីតាំងនុយក្លេអ៊ែរអ៊ីរ៉ង់សំខាន់ៗ ដោយចូលដៃជាមួយអ៊ីស្រាអែលក្នុងសកម្មភាពយោធាលោកខាងលិចដ៏ធំបំផុតប្រឆាំងនឹងសាធារណរដ្ឋអ៊ីស្លាមមួយនេះចាប់តាំងពីបដិវត្តន៍ឆ្នាំ១៩៧៩របស់ខ្លួន។     

អ៊ីរ៉ង់បានប្តេជ្ញាការពារខ្លួនមួយថ្ងៃបន្ទាប់ពីសហរដ្ឋអាមេរិកបានទម្លាក់គ្រាប់បែកផ្ទុកគ្រឿងផ្ទុះទម្ងន់ ៣០.០០០ ផោនទៅលើភ្នំខាងលើទីតាំងនុយក្លេអ៊ែរ Fordow របស់អ៊ីរ៉ង់ ខណៈមេដឹកនាំអាមេរិកបានជំរុញឱ្យទីក្រុងតេអេរ៉ង់ លុតជង្គង់ចុះ ទន្ទឹមនឹងការផ្ទុះបាតុករប្រឆាំងសង្គ្រាមនៅក្នុងទីក្រុងនានារបស់សហរដ្ឋអាមេរិក។

ក្នុងការបង្ហោះលើវេទិកាសង្គម Truth Social កាលពីថ្ងៃអាទិត្យ ប្រធានាធិបតីអាមេរិក Donald Trump បានលើកឡើងពីបញ្ហានៃការផ្លាស់ប្តូររបបក្នុងប្រទេសអ៊ីរ៉ង់។ "ការប្រើពាក្យថា 'ការផ្លាស់ប្តូររបបនយោបាយ' វាមិនត្រឹមត្រូវទេ ប៉ុន្តែប្រសិនបើរបបអ៊ីរ៉ង់បច្ចុប្បន្នមិនអាចធ្វើឱ្យអ៊ីរ៉ង់មានភាពអស្ចារ្យម្ដងទៀតបាន ហេតុអ្វីមិនមានការផ្លាស់ប្តូររបបនេះ? ។ 

អ៊ីរ៉ង់ និងអ៊ីស្រាអែល បានបន្តការបាញ់ផ្លោងដាក់គ្នាដោយមីស៊ីល។ អ្នកនាំពាក្យយោធាអ៊ីស្រាអែលបាននិយាយថា យន្តហោះចម្បាំងអ៊ីស្រាអែលបានវាយប្រហារគោលដៅយោធានៅភាគខាងលិចប្រទេសអ៊ីរ៉ង់។ មុននេះ អ៊ីរ៉ង់បានបាញ់មីស៊ីលដែលបានបណ្តាលឱ្យមនុស្សជាច្រើននាក់រងរបួស និងបាក់រលំអគារក្នុងក្រុង Tel Aviv ។

ថ្លែងក្នុងទីក្រុងអ៊ីស្តង់ប៊ុល រដ្ឋមន្ត្រីការបរទេសអ៊ីរ៉ង់ លោក Abbas Araqchi បាននិយាយថា ប្រទេសរបស់លោកនឹងពិចារណារាល់ការឆ្លើយតបដែលអាចធ្វើទៅបាន។ លោកបានបន្តថានឹងមិនមានការវិលត្រឡប់ទៅរកការទូតវិញទេរហូតទាល់តែមានការសងសឹក។បណ្ដាមេដឹកនាំពិភពលោកជាច្រើនខ្លះបានថ្កោលទោសអាមេរិកចំពោះការវាយប្រហារលើអ៊ីរ៉ង់ និងខ្លះជំរុញឲ្យមានការសន្ទនាតាមផ្លូវការទូតបន្ធូរបន្ថយភាពតានតឹងនៅមជ្ឈិមបូព៌ា ខណៈរង់ចាំមើលការវិវត្តន៍ស្ថានការណ៍៕