អូទ្រីស៖ ការចរចាជុំទី៨ ស្តីពីការស្តារឡើងវិញនូវកិច្ចព្រមព្រៀងនុយក្លេអ៊ែរអ៊ីរ៉ង់ បានចាប់ផ្តើមនៅទីក្រុងវីយែន ប្រទេសអូទ្រីស ដោយអ៊ីរ៉ង់បាននិយាយថា អ្នកចូលរួមបានធ្វើការយ៉ាងទូលំទូលាយពីអត្ថបទសេចក្តីព្រាងទូទៅដែលអាចទទួលយកបាន ហើយថាក្រុមការងាររបស់ខ្លួនមានឆន្ទៈបន្តឱ្យបានយូរ តាមដែលវាត្រូវការដើម្បីឈានដល់កិច្ចព្រមព្រៀងមួយ។
កិច្ចចរចាដោយប្រយោលរវាងអ៊ីរ៉ង់ និងសហរដ្ឋអាមេរិកស្តីពីការស្រោចស្រង់កិច្ចព្រមព្រៀងនុយក្លេអ៊ែរអ៊ីរ៉ង់ឆ្នាំ២០១៥ បានចាប់ផ្តើមឡើងវិញកាលពីថ្ងៃចន្ទ (២៧ ធ្នូ) ខណៈទីក្រុងតេអេរ៉ង់បានផ្តោតលើផ្នែកម្ខាងនៃការចរចាតាំងពីដំបូង ដោយតម្រូវឲ្យដកទណ្ឌកម្មប្រឆាំងនឹងខ្លួនជាមុន បើទោះបីជាមានការរីកចម្រើនតិចតួចលើការបន្តសកម្មភាពបរមាណូរបស់ខ្លួនក៏ដោយ។ រដ្ឋមន្ត្រីការបរទេសអ៊ីរ៉ង់ លោក Hossein Amir-Abdollahian បាននិយាយថា លោកចង់ឱ្យការផ្តោតការយកចិត្តទុកដាក់នៃកិច្ចចរចានាពេលខាងមុខ ទៅលើរបៀបដែលទីក្រុងតេអេរ៉ង់អាចផ្ទៀងផ្ទាត់ថា ទណ្ឌកម្មរបស់សហរដ្ឋអាមេរិកត្រូវបានដកចេញយ៉ាងពិតប្រាកដ។ កិច្ចព្រមព្រៀងដ៏សំខាន់ឆ្នាំ២០១៥ ដែលអតីតប្រធានាធិបតីអាមេរិកលោក Donald Trump ដកសហរដ្ឋអាមេរិកចេញ បានដកទណ្ឌកម្មលើអ៊ីរ៉ង់ជាថ្នូរនឹងការគ្រប់គ្រងលើកម្មវិធីនុយក្លេអ៊ែរស៊ីវិលរបស់ខ្លួន។
លោក Amir-Abdollahian បាននិយាយថា យើងត្រូវតែឈានដល់ចំណុចមួយដែលប្រេងអ៊ីរ៉ង់អាចលក់បានយ៉ាងងាយស្រួល និងគ្មានការរឹតបន្តឹងណាមួយ ដូច្នេះប្រាក់ដែលបានមកពីការលក់ប្រេងនោះ អាចត្រូវបានផ្ទេរជារូបិយប័ណ្ណបរទេសទៅកាន់គណនីធនាគាររបស់ប្រទេសអ៊ីរ៉ង់។ អ៊ីរ៉ង់ព្រួយបារម្ភថា ក្រុមហ៊ុនក្នុងបណ្ដាប្រទេសលោកខាងលិចនឹងស្ទាក់ស្ទើរ ក្នុងការវិនិយោគក្នុងប្រទេសអ៊ីរ៉ង់ដោយសារតែការភ័យខ្លាចថា ប្រធានាធិបតីអាមេរិកអនាគតមកពីខាងសាធារណរដ្ឋអាចដាក់ទណ្ឌកម្មឡើងវិញនៅឆ្នាំ២០២៥ ដោយធ្វើឱ្យការវិនិយោគរបស់ពួកគេស្ថិតក្នុងគ្រោះថ្នាក់ដូចបានកើតឡើងកាលពីក្នុងឆ្នាំ២០១៨ នៅពេលដែលលោក Trump ដកខ្លួនចេញពីកិច្ចព្រមព្រៀងនេះ៕
អត្ថបទ៖ សុខមាន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
